విలక్షణ నటుడు శ్రీవిష్ణు, రెబా మోనికా జాన్ ప్రధాన పాత్రల్లో నటిస్తున్న తాజా సస్పెన్స్ థ్రిల్లర్ ‘మృత్యుంజయ్’. హుస్సేన్ షా కిరణ్ దర్శకత్వంలో తెరకెక్కిన ఈ సినిమా ట్రైలర్ను స్టార్ హీరో జూనియర్ ఎన్టీఆర్ శనివారం తన ఎక్స్ (ట్విట్టర్) ఖాతా ద్వారా విడుదల చేశారు. ఈ చిత్ర నిర్మాత సన్నీ గుణ్ణం (సందీప్ గుణ్ణం) తో తనకు ఉన్న 18 ఏళ్ల సుదీర్ఘ స్నేహాన్ని గుర్తు చేసుకున్న తారక్, తన స్నేహితుడు నిర్మాతగా వేస్తున్న తొలి అడుగు విజయవంతం కావాలని చిత్ర బృందానికి మనస్ఫూర్తిగా శుభాకాంక్షలు తెలిపారు.
తాజాగా విడుదలైన ట్రైలర్ ఆద్యంతం ఉత్కంఠభరితమైన సన్నివేశాలతో సాగింది. ఇందులో శ్రీవిష్ణు ఒక జర్నలిస్ట్ పాత్రలో కనిపిస్తుండగా, రెబా జాన్ పోలీస్ అధికారిణిగా నటించారు. ఒక మరణం చుట్టూ అల్లుకున్న మిస్టరీని ఛేదించే క్రమంలో హీరో ఎదుర్కొనే సవాళ్లు, “ఓడిపోతామనే భయంతో పోరాడకపోవడమే తప్పు” వంటి పవర్ ఫుల్ సంభాషణలు సినిమాపై అంచనాలను పెంచుతున్నాయి. కాలభైరవ అందించిన నేపథ్య సంగీతం, గ్రిప్పింగ్ విజువల్స్ ట్రైలర్కు ప్రధాన ఆకర్షణగా నిలిచాయి.
నిజానికి ఈ చిత్రం ఫిబ్రవరి 27న విడుదల కావాల్సి ఉండగా, కొన్ని కారణాల వల్ల మార్చి 6కి వాయిదా పడింది. “రిలీజ్ డేట్ మారింది, థ్రిల్ కాదు!” అంటూ శ్రీవిష్ణు ఈ విషయాన్ని సోషల్ మీడియాలో ధృవీకరించారు. లైట్ బాక్స్ మీడియా పతాకంపై నిర్మితమైన ఈ చిత్రానికి విద్యాసాగర్ సినిమాటోగ్రఫీ అందించగా, లెజెండరీ ఎడిటర్ శ్రీకర్ ప్రసాద్ ఎడిటింగ్ బాధ్యతలు నిర్వహించారు. వేసవి కానుకగా వస్తున్న ఈ క్రైమ్ థ్రిల్లర్ ప్రేక్షకులను ఏ మేరకు మెప్పిస్తుందో చూడాలి.
