బంగారం కొనుగోలు చేసేటప్పుడు 24 క్యారెట్లు, 22 క్యారెట్లు, 18 క్యారెట్లు అనే పదాలు తరచూ వినిపిస్తాయి. అయితే బంగారం స్వచ్ఛతను 24 క్యారెట్లలోనే ఎందుకు కొలుస్తారు? 50 లేదా 100 క్యారెట్లు ఎందుకు ఉండవు? అనే సందేహం చాలామందికి ఉంటుంది. దీనికి సమాధానం తెలుసుకోవాలంటే వేల ఏళ్ల నాటి కొలతల చరిత్రను తెలుసుకోవాలి. ప్రాచీన కాలంలో డిజిటల్ త్రాసులు, ఆధునిక కొలత పరికరాలు అందుబాటులో లేకపోవడంతో విలువైన వస్తువుల బరువును సహజ ప్రమాణాలతో కొలిచేవారు.
మధ్యధరా సముద్ర ప్రాంతాల్లో విస్తారంగా పెరిగే కారోబ్ చెట్టు గింజలు దాదాపు ఒకే బరువుతో ఉండేవని అప్పటి వ్యాపారులు గుర్తించారు. ఒక్కో కారోబ్ గింజ బరువు సుమారు 0.18 నుంచి 0.20 గ్రాముల వరకు ఉండేది. దీంతో బంగారం, వజ్రాలు వంటి విలువైన వస్తువులను తూకం వేయడానికి ఈ గింజలను ప్రమాణంగా ఉపయోగించడం ప్రారంభమైంది. కాలక్రమేణా ఈ కొలత విధానం ‘క్యారెట్’ అనే పదానికి పునాదిగా మారింది.
బంగారం స్వచ్ఛత విషయంలో 24 క్యారెట్లు అంటే మొత్తం 24 భాగాల్లో 24 భాగాలు స్వచ్ఛమైన బంగారం అని అర్థం. 22 క్యారెట్ల బంగారంలో 24 భాగాల్లో 22 భాగాలు బంగారం, మిగిలిన 2 భాగాలు ఇతర లోహాలు ఉంటాయి. అదేవిధంగా 18 క్యారెట్లలో 18 భాగాలు బంగారం, 6 భాగాలు ఇతర లోహాలు ఉంటాయి. అందుకే బంగారం స్వచ్ఛతను 24 భాగాల ప్రామాణికంగా కొలుస్తారు. అంటే ‘24 క్యారెట్లు’ అనేది బంగారం స్వచ్ఛతను సూచించే పాత కొలత విధానం నుంచి అభివృద్ధి చెందిన ప్రమాణం.
