తమిళ స్టార్ హీరో సూర్య చేసిన తాజా వ్యాఖ్యలు సినీ వర్గాల్లో ఆసక్తికర చర్చకు దారితీశాయి. సినిమా విజయాలు, అపజయాల గురించి ఓ ఇంటర్వ్యూలో మాట్లాడిన ఆయన.. తన కెరీర్లో ఎదురైన అనుభవాలను పంచుకున్నారు. ‘కంగువ’ సినిమా కోసం దాదాపు 200 రోజుల పాటు పనిచేశానని, ఎంతో కష్టపడి భారీ స్థాయిలో తెరకెక్కించినప్పటికీ ఆశించిన ఫలితాన్ని అందుకోలేకపోయిందని సూర్య తెలిపారు. అదే సమయంలో ‘కరుప్పు’ సినిమాను కేవలం 45 రోజుల్లో పూర్తి చేశామని, అయితే విడుదలైన తర్వాత అది భారీ విజయాన్ని అందుకుందని పేర్కొన్నారు.
సినిమా పరిశ్రమలో సక్సెస్కు ఎలాంటి కచ్చితమైన ఫార్ములా ఉండదని సూర్య అభిప్రాయపడ్డారు. ఇండస్ట్రీలో తనకు 30 ఏళ్ల అనుభవం ఉన్నప్పటికీ, సినిమాల గురించి అన్నీ నేర్చుకున్నానని చెప్పలేనని అన్నారు. ఏ సినిమా ప్రేక్షకులను ఎలా ఆకట్టుకుంటుందో ముందుగానే అంచనా వేయడం చాలా కష్టమని, ప్రతి సినిమా తనకు ఒక కొత్త అనుభవాన్ని నేర్పిస్తుందని సూర్య తెలిపారు. ‘కంగువ’లో ద్విపాత్రాభినయం చేసిన ఆయన.. దర్శకుడు శివ తెరకెక్కించిన ఈ భారీ పీరియాడిక్ యాక్షన్ ఫాంటసీ చిత్రంలో నటించారు.
ఇక ఆర్జే బాలాజీ దర్శకత్వంలో తెరకెక్కిన ‘కరుప్పు’ చిత్రాన్ని డ్రీమ్ వారియర్ పిక్చర్స్ నిర్మించింది. ఈ సినిమా ఫాంటసీ యాక్షన్ డ్రామాగా ప్రేక్షకుల ముందుకు వచ్చి మంచి విజయాన్ని అందుకున్నట్లు సమాచారం. ‘కంగువ’, ‘కరుప్పు’ చిత్రాలను పోల్చుతూ సూర్య చేసిన వ్యాఖ్యలు ప్రస్తుతం సోషల్ మీడియాలో వైరల్ అవుతున్నాయి. సినిమా విజయాన్ని కేవలం భారీ బడ్జెట్, ఎక్కువ షూటింగ్ రోజులు లేదా నిర్మాణ విలువలు నిర్ణయించవని.. చివరికి ప్రేక్షకుల ఆదరణే అసలైన విజయానికి కొలమానం అని సూర్య వ్యాఖ్యలు మరోసారి గుర్తు చేస్తున్నాయని సినీ వర్గాలు అభిప్రాయపడుతున్నాయి.
