తెలంగాణలో కాంగ్రెస్, ఎంఐఎం పార్టీల మధ్య కొనసాగుతున్న రాజకీయ స్నేహంపై ఏఐసీసీ అగ్రనేత రాహుల్ గాంధీ కీలక వ్యాఖ్యలు చేసినట్లు తెలుస్తోంది. ప్రస్తుతం రాష్ట్రంలో ఈ రెండు పార్టీలు మిత్రపక్షాలుగా వ్యవహరిస్తుండగా, ఎంఐఎం విషయంలో ఆచితూచి వ్యవహరించాలని ముఖ్యమంత్రి రేవంత్ రెడ్డికి రాహుల్ సూచించినట్లు సమాచారం. ఎంఐఎం పార్టీ ఎక్కడ విస్తరిస్తే అక్కడ బీజేపీకి రాజకీయంగా లబ్ధి చేకూరుతుందని, ఉత్తరాది రాష్ట్రాల్లో ఇప్పటికే ఇది నిరూపితమైందని రాహుల్ అభిప్రాయపడినట్లు పార్టీ వర్గాల్లో చర్చ నడుస్తోంది. మజ్లిస్ పార్టీతో అతిగా స్నేహం చేస్తే గ్రామీణ ప్రాంతాల్లోని హిందూ ఓట్లపై ప్రభావం పడే అవకాశం ఉందని ఆయన హెచ్చరించినట్లు తెలుస్తోంది.
ఇటీవల జరిగిన మున్సిపల్ ఎన్నికల్లో కాంగ్రెస్ మెజారిటీ సాధించినప్పటికీ, క్షేత్రస్థాయిలో బీఆర్ఎస్ 29 శాతం, బీజేపీ 16 శాతం ఓట్లను దక్కించుకోవడంపై హైకమాండ్ దృష్టి సారించింది. ముఖ్యంగా బీహార్, ఢిల్లీ వంటి రాష్ట్రాల్లో కాంగ్రెస్ గెలుపు అవకాశాలను ఎంఐఎం దెబ్బతీసి, పరోక్షంగా బీజేపీకి మేలు చేసిందని జాతీయ నాయకత్వం విశ్లేషిస్తోంది. అందుకే, మిత్రపక్షంగా ఉన్నప్పటికీ ఎంఐఎంను కట్టడి చేస్తూనే, బీజేపీ మరియు బీఆర్ఎస్ బలాన్ని తగ్గించేలా అభివృద్ధి మంత్రంతో ముందుకు వెళ్లాలని రేవంత్ సర్కార్కు దిశానిర్దేశం చేసినట్లు సమాచారం. సామాజిక న్యాయం నినాదంతో పాటు యువత, మహిళలను పార్టీకి మరింత చేరువ చేయాలని ఆదేశించినట్లు తెలుస్తోంది.
త్వరలో జరగనున్న గ్రేటర్ హైదరాబాద్ మున్సిపల్ కార్పొరేషన్ (GHMC) ఎన్నికల నేపథ్యంలో ఈ పరిణామం ఆసక్తికరంగా మారింది. గ్రేటర్ ఎన్నికల్లో ఎంఐఎం మద్దతు రేవంత్ రెడ్డికి అనివార్యం కాగా, అధిష్టానం హెచ్చరికల నేపథ్యంలో ఆయన ఎలాంటి వ్యూహాన్ని అనుసరిస్తారనేది చర్చనీయాంశమైంది. అటు జాతీయవాదం, ఇటు ప్రాంతీయవాదం నినాదాలతో ప్రతిపక్షాలు జనాన్ని ఆకర్షించే అవకాశం ఉన్నందున, ఏమాత్రం ఏమరపాటుగా ఉన్నా పార్టీకి నష్టం తప్పదని హైకమాండ్ భావిస్తోంది. మరి రాహుల్ గాంధీ అలెర్ట్ తర్వాత రేవంత్ రెడ్డి మజ్లిస్ పార్టీతో తన బంధాన్ని ఎలా సమన్వయం చేసుకుంటారో వేచి చూడాలి.
