ప్రేమ వివాహాల రిజిస్ట్రేషన్ కోసం తల్లిదండ్రుల అంగీకారాన్ని తప్పనిసరి చేస్తూ గుజరాత్ ప్రభుత్వం తీసుకున్న నిర్ణయం ఇప్పుడు దేశవ్యాప్తంగా చర్చనీయాంశమైంది. లవ్ జిహాదీ మరియు వివాహం పేరుతో జరుగుతున్న మోసాలను అరికట్టేందుకు ఈ నిబంధనలు తెచ్చినట్లు ప్రభుత్వం పేర్కొంది. కొత్త రూల్స్ ప్రకారం, వివాహం చేసుకునే వారు తమ దరఖాస్తులో తల్లిదండ్రుల సమ్మతిని తెలియజేయాలి. ఒకవేళ తెలియజేయకపోతే, రిజిస్ట్రార్ ఆ వివాహం గురించి 10 రోజుల్లోపు ఇరు కుటుంబాల తల్లిదండ్రులకు సమాచారం అందించాల్సి ఉంటుంది. అంతేకాకుండా, దరఖాస్తు చేసినప్పటి నుండి సర్టిఫికేట్ జారీ చేయడానికి 30 రోజుల గడువును తప్పనిసరి చేశారు.
అయితే, ఈ నిర్ణయం భారత రాజ్యాంగం కల్పించిన ప్రాథమిక హక్కులను కాలరాయడమేనని న్యాయ నిపుణులు వాదిస్తున్నారు. ఆర్టికల్ 21 ప్రకారం, ఒక మేజర్ తనకు నచ్చిన వ్యక్తిని భాగస్వామిగా ఎంచుకునే స్వేచ్ఛను కలిగి ఉంటారని, ఇందులో ప్రభుత్వం లేదా కుటుంబం జోక్యం చేసుకోవడానికి వీల్లేదని నిపుణులు గుర్తు చేస్తున్నారు. గుజరాత్ ప్రభుత్వం తెచ్చిన ఈ ‘తల్లిదండ్రుల సమ్మతి’ నిబంధన వ్యక్తిగత గోప్యతను మరియు స్వేచ్ఛను హరించడమేనని ఆందోళన వ్యక్తం చేస్తున్నారు.
గతంలో సుప్రీంకోర్టు వెలువరించిన పలు తీర్పులు కూడా గుజరాత్ ప్రభుత్వ నిర్ణయానికి విరుద్ధంగా ఉన్నాయి. ముఖ్యంగా 2021లో లక్ష్మీబాయి చందరగి కేసులో, ఇద్దరు మేజర్లు పెళ్లి చేసుకోవాలనుకున్నప్పుడు కుటుంబం లేదా సమాజం సమ్మతి అవసరం లేదని ధర్మాసనం స్పష్టం చేసింది. అలాగే, 2018 షఫీ జహాన్ వర్సెస్ కె.ఎం. అశోకన్ మరియు 2006 లతా సింగ్ కేసులలో కూడా భాగస్వామిని ఎంచుకునే హక్కును అత్యున్నత న్యాయస్థానం సమర్థించింది. ఈ నిబంధనలు కోర్టు ధిక్కరణకు దారితీసే అవకాశం ఉందని, గోప్యతకు భంగం కలిగించేలా ఉన్నాయన్న వాదనలు బలంగా వినిపిస్తున్నాయి.
