ఆంధ్రప్రదేశ్ తూర్పు ప్రాంత విద్యుత్ పంపిణీ సంస్థ (APEPDCL) పరిధిలో ఖాళీగా ఉన్న 2,947 పోస్టులను త్వరలోనే భర్తీ చేస్తామని రాష్ట్ర ఇంధన శాఖ మంత్రి గొట్టిపాటి రవికుమార్ అసెంబ్లీ వేదికగా వెల్లడించారు. నిరుద్యోగులకు ఇది ఒక గొప్ప అవకాశమని, విద్యుత్ శాఖలో సిబ్బంది కొరత లేకుండా చర్యలు తీసుకుంటున్నామని ఆయన పేర్కొన్నారు. ఈ పోస్టుల భర్తీ ప్రక్రియకు సంబంధించి ప్రభుత్వం ఇప్పటికే కసరత్తు ప్రారంభించింది.
భర్తీ చేయనున్న ఖాళీల వివరాలను పరిశీలిస్తే, అత్యధికంగా జూనియర్ లైన్ మెన్ (1,260) మరియు అసిస్టెంట్ లైన్ మెన్ (1,084) పోస్టులు ఉన్నాయి. వీటితో పాటు ఎనర్జీ అసిస్టెంట్లు (581), మరియు లైన్ మెన్ (22) పోస్టులను కూడా భర్తీ చేయనున్నారు. వినియోగదారులకు నాణ్యమైన విద్యుత్తును అందించడంలో ఎలాంటి అంతరాయం కలగకుండా ఉండేందుకు ఈ నియామకాలు అత్యంత కీలకం కానున్నాయి.
మంత్రి తన ప్రసంగంలో వ్యవసాయ విద్యుత్ కనెక్షన్ల గురించి కూడా కీలక సమాచారం అందించారు. రాష్ట్రవ్యాప్తంగా దాదాపు 22.3 లక్షల ఉచిత వ్యవసాయ విద్యుత్ కనెక్షన్లు ఉన్నాయని, కూటమి ప్రభుత్వం అధికారంలోకి వచ్చిన తర్వాత లక్షకు పైగా కొత్త కనెక్షన్లు మంజూరు చేశామని తెలిపారు. మిగిలిన 46 వేల పెండింగ్ కనెక్షన్లను వచ్చే సీజన్ నాటికి పూర్తి చేస్తామని, సోలార్ ప్రాజెక్టుల ద్వారా రైతులకు పగటిపూట 9 గంటల విద్యుత్ అందించడమే తమ లక్ష్యమని స్పష్టం చేశారు
