టాలీవుడ్ క్రియేటివ్ డైరెక్టర్ కృష్ణవంశీ ఇటీవలి కాలంలో సోషల్ మీడియాలో వెల్లువెత్తుతున్న సినిమా రివ్యూలపై తీవ్రస్థాయిలో మండిపడ్డారు. ఏదైనా సినిమా విడుదలైన వెంటనే ధియేటర్ల నుండి వెలువడే నెగెటివ్ రివ్యూలు ఆ సినిమా భవిష్యత్తును దెబ్బతీస్తున్నాయని ఆయన ఆవేదన వ్యక్తం చేశారు. “సినిమా కోసం వందలాది మంది అహోరాత్రులు కష్టపడతారు, కానీ కొందరు కేవలం నిమిషాల్లో ఇచ్చే రివ్యూలతో ఆ కష్టాన్ని నాశనం చేస్తున్నారు” అని ఆయన ఆగ్రహం వ్యక్తం చేశారు. రివ్యూలు రాసే వారిలో 90 శాతం మంది మూర్ఖులేనని ఆయన సంచలన వ్యాఖ్యలు చేశారు.
రివ్యూల పేరుతో సినిమాను చంపేస్తున్న వారిపై విమర్శలు గుప్పిస్తూ.. “మీరు టికెట్ కూడా కొనకుండా ఫ్రీగా సినిమాలు చూస్తూ, మళ్ళీ అదే సినిమాపై విషం చిమ్ముతున్నారు. సినిమా లేకపోతే మీ బతుకే లేదు, అలాంటిది అదే పరిశ్రమను ఎలా నాశనం చేస్తారు?” అని ఆయన ప్రశ్నించారు. ప్రేక్షకులు సినిమా చూసి నిర్ణయం తీసుకోవడానికి కనీసం వారం రోజుల సమయం కూడా ఇవ్వకుండా, ముందే వారిని భయపెట్టేయడం అన్యాయమని కృష్ణవంశీ పేర్కొన్నారు. సినిమా బాగున్నా, బాలేకపోయినా అది ప్రేక్షకుల నిర్ణయానికే వదిలేయాలని, కృత్రిమంగా నెగెటివ్ ప్రచారం చేయవద్దని సూచించారు.
ప్రస్తుత డిజిటల్ యుగంలో సోషల్ మీడియా ప్రభావం పెరగడంతో సినిమా టాక్ సెకన్లలో మారిపోతోందని, ఇది చిన్న సినిమాలకు మరియు కొత్త ప్రయోగాలకు గొడ్డలిపెట్టుగా మారుతోందని పరిశ్రమ వర్గాలు కూడా చర్చించుకుంటున్నాయి. కృష్ణవంశీ వ్యాఖ్యలు ఇప్పుడు ఫిల్మ్ నగర్లో హాట్ టాపిక్గా మారాయి. ఆయన ఆవేదనలో వాస్తవం ఉందని కొందరు సమర్థిస్తుంటే, విమర్శ చేసే హక్కు ప్రేక్షకులకు ఉంటుందని మరికొందరు అభిప్రాయపడుతున్నారు. మొత్తం మీద కృష్ణవంశీ చేసిన ఈ వ్యాఖ్యలు రివ్యూల సంస్కృతిపై మరోసారి పెద్ద చర్చకు దారితీశాయి.
