తెలంగాణ మున్సిపల్ ఎన్నికల ఫలితాల్లో మాజీ ఎమ్మెల్సీ కల్వకుంట్ల కవిత తన రాజకీయ ముద్రను బలంగా చాటారు. జోగులాంబ గద్వాల జిల్లా అలంపూర్ నియోజకవర్గ పరిధిలోని వడ్డేపల్లి మున్సిపాలిటీని కవిత నేతృత్వంలోని తెలంగాణ జాగృతి వర్గం కైవసం చేసుకుంది. సొంత పార్టీని అధికారికంగా ప్రకటించకముందే, మున్సిపల్ ఎన్నికల్లో తన బలాన్ని నిరూపించుకోవడం ద్వారా కవిత రాష్ట్ర రాజకీయాల్లో హాట్ టాపిక్గా మారారు. ఈ విజయం ఆమె భవిష్యత్తు రాజకీయ ప్రస్థానానికి గట్టి పునాది వేసినట్లు విశ్లేషకులు భావిస్తున్నారు.
వడ్డేపల్లి మున్సిపాలిటీలో మొత్తం 10 వార్డులు ఉండగా, కవిత మద్దతుదారులు ఏకంగా 8 స్థానాల్లో ఘనవిజయం సాధించారు. జాగృతి పార్టీ నేత వాడేపల్లి శ్రీనివాస్ ఆధ్వర్యంలో అభ్యర్థులందరూ ‘ఆల్ ఇండియా ఫార్వర్డ్ బ్లాక్’ పార్టీకి చెందిన సింహం గుర్తుపై పోటీ చేశారు. కవిత జాగృతి వర్గం 8 వార్డులను గెలుచుకోగా, అధికార కాంగ్రెస్ మరియు ప్రధాన ప్రతిపక్షం బీఆర్ఎస్ పార్టీలు చెరో ఒక్క వార్డుకే పరిమితం కావడం గమనార్హం. ఎనిమిది వార్డుల మెజారిటీతో వడ్డేపల్లి మున్సిపల్ పీఠం కవిత వర్గానికే దక్కడం ఖాయమైంది.
బీఆర్ఎస్ నుంచి బయటకు వచ్చిన తర్వాత కవిత తెలంగాణ జాగృతి ద్వారా క్షేత్రస్థాయిలో చేసిన సేవా కార్యక్రమాలు ఈ విజయానికి ప్రధాన కారణమని స్థానిక నేతలు అభిప్రాయపడుతున్నారు. పార్టీ పెట్టకముందే ఒక మున్సిపాలిటీని గెలుచుకోవడం ద్వారా ఆమె తన సత్తాను చాటారు. ఫలితాలు వెలువడగానే వడ్డేపల్లిలో జాగృతి కార్యకర్తలు భారీ ఎత్తున సంబరాలు జరుపుకున్నారు. రాష్ట్రవ్యాప్తంగా కాంగ్రెస్ హవా కొనసాగుతున్నప్పటికీ, ఒక మున్సిపాలిటీని స్వతంత్ర పంథాలో గెలుచుకోవడం కవిత సాధించిన రాజకీయ విజయంగా నిలిచింది.
