అల్లూరి సీతారామరాజు జిల్లా ముంచింగిపుట్ మండలంలోని కిలగడ ప్రభుత్వ పాఠశాల అరుదైన మైలురాయిని చేరుకుంది. బ్రిటీష్ హయాంలో, అంటే 1905లో ఒక చిన్న గుడిసెలో, ఒకే ఒక ఉపాధ్యాయుడితో ప్రారంభమైన ఈ పాఠశాల ఇప్పుడు 120 వసంతాలు పూర్తి చేసుకుని శతాబ్ధి ఉత్సవాలకు సిద్ధమైంది. నేటి కాలంలో ప్రభుత్వ పాఠశాలలు మూతబడుతున్న తరుణంలో, ఈ మారుమూల గిరిజన ప్రాంతంలోని పాఠశాల ఏకంగా 120 ఏళ్ల పాటు నిరంతరాయంగా విద్యాబోధన అందించడం విశేషం. ఈ ఏడాది ఏప్రిల్ 14, 15 తేదీలలో పాఠశాల పూర్వ విద్యార్థులు, గ్రామస్తులు కలిసి ఘనంగా వేడుకలు నిర్వహించేందుకు ఏర్పాట్లు చేస్తున్నారు.
ప్రైవేట్ పాఠశాలల పోటీని తట్టుకుంటూ, కిలగడ పాఠశాల నేటికీ తన ఉనికిని చాటుకుంటోంది. ప్రస్తుతం ఇక్కడ 220 మంది విద్యార్థులు చదువుకుంటున్నారు. ఒకప్పుడు ప్రాథమిక పాఠశాలగా ప్రారంభమై, 1990లో ఉన్నత పాఠశాలగా అప్గ్రేడ్ అయ్యింది. ప్రస్తుతం ఇది ఒకటి నుంచి ఐదో తరగతి వరకు మోడల్ ప్రైమరీ స్కూల్గా, ఆరు నుంచి పదో తరగతి వరకు హైస్కూలుగా సేవలు అందిస్తోంది. ప్రధాన రహదారికి సుమారు రెండు కిలోమీటర్ల దూరంలో ఉన్నప్పటికీ, ఇక్కడి విద్యా ప్రమాణాల మీద నమ్మకంతో గిరిజన విద్యార్థులు రోజూ నడుచుకుంటూ వచ్చి మరీ చదువుకోవడం ఈ స్కూల్ గొప్పతనాన్ని తెలియజేస్తోంది.
ఈ పాఠశాల యొక్క ట్రాక్ రికార్డు అత్యంత ప్రతిష్టాత్మకమైనది. ఇక్కడ చదువుకున్న ఎంతో మంది విద్యార్థులు ఇప్పుడు సమాజంలో ఉన్నత హోదాల్లో స్థిరపడ్డారు. డాక్టర్లు, ఇంజనీర్లు, బ్యాంకర్లు మరియు పోలీసు అధికారులుగా వివిధ రంగాల్లో రాణిస్తున్నారు. ఇక్కడ చదివిన కొండయ్య అనే 85 ఏళ్ల వృద్ధుడు, అదే స్కూలులో టీచర్గా పనిచేసి రిటైర్ అవ్వడం ఒక మరపురాని జ్ఞాపకం. కేవలం చదువు మాత్రమే కాకుండా, గిరిజన ప్రాంతంలో విద్యా విప్లవానికి నాంది పలికిన ఈ విద్యాసంస్థను ఆ ప్రాంత ప్రజలు ఒక వారసత్వ సంపదగా గౌరవిస్తున్నారు.
