ఏలూరు జిల్లా తెలుగుదేశం పార్టీలో అంతర్గత విభేదాలు ఒక్కసారిగా రచ్చకెక్కాయి. ఏలూరులో జరిగిన ఒక కార్యక్రమంలో ఎమ్మెల్యే చింతమనేని ప్రభాకర్, మంత్రి కొలుసు పార్థసారథి ఒకరిపై ఒకరు నేరుగా విమర్శలు చేసుకున్నారు. కూటమి అంటే కేవలం టీడీపీ, జనసేన, బీజేపీ మాత్రమేనని, వైఎస్సార్ కాంగ్రెస్ నుంచి వచ్చిన వారు కేవలం రాజకీయ లబ్ధి కోసమే టీడీపీ కండువా కప్పుకున్నారని చింతమనేని సంచలన వ్యాఖ్యలు చేశారు. వీరంతా ‘కోవర్టులు’ అని, సమయం చూసి మళ్లీ జగన్ వద్దకు వెళ్లిపోతారని ఆయన హెచ్చరించడం పార్టీ వర్గాల్లో కలకలం రేపింది.
చింతమనేని ప్రభాకర్ ఎవరి పేరును నేరుగా ప్రస్తావించనప్పటికీ, వైఎస్సార్సీపీ నుంచి వచ్చి మంత్రి పదవి చేపట్టిన పార్థసారథిని ఉద్దేశించే ఈ వ్యాఖ్యలు చేశారని స్పష్టమవుతోంది. చింతమనేని ప్రసంగం ముగించుకుని వెళ్లిపోయిన తర్వాత, మంత్రి పార్థసారథి అదే వేదికపై నుంచి ఘాటుగా సమాధానమిచ్చారు. పార్టీలో చేరికలు అనేవి అధిష్టానం నిర్ణయమని, చంద్రబాబు నాయుడు మరియు లోకేష్ తీసుకున్న నిర్ణయమే ఫైనల్ అని ఆయన స్పష్టం చేశారు. ఎవరికి ఇష్టం ఉన్నా లేకపోయినా అధిష్టానం ఆదేశాలను శిరోధార్యంగా భావించి వినాల్సిందేనని మంత్రి తేల్చి చెప్పారు.
ఈ ఇద్దరు కీలక నేతల మధ్య రేగిన ఈ ‘కోవర్టు’ వివాదం ఇప్పుడు సోషల్ మీడియాలో చర్చనీయాంశంగా మారింది. ఇరు వర్గాల అనుచరులు ఒకరిపై ఒకరు వ్యతిరేక పోస్టులు పెట్టుకుంటూ సోషల్ మీడియా యుద్ధానికి దిగారు. పార్టీలో పాత తరం నాయకులు మరియు కొత్తగా వచ్చిన వారి మధ్య సమన్వయం లోపించిందనే విషయం ఈ ఘటనతో బహిర్గతమైంది. రాబోయే రోజుల్లో ఈ వివాదం చల్లారుతుందా లేక ఏలూరు రాజకీయాల్లో మరింత చిచ్చు రేపుతుందా అన్నది వేచి చూడాలి.
