మచిలీపట్నం నియోజకవర్గంలోని పెద్దపట్నం గ్రామంలో కొందరు యువకులు చేసిన అత్యుత్సాహం ఇప్పుడు వారిని చిక్కుల్లో పడేసింది. సతీష్, రాంకీ, రాజేష్, సంతోష్ కుమార్ అనే నలుగురు యువకులు పుట్టినరోజు వేడుకల సందర్భంగా మద్యం మత్తులో గొడ్డలితో కేక్ కట్ చేశారు. ఈ వికృత చేష్టలను వీడియో తీసి సోషల్ మీడియాలో పోస్ట్ చేయడంతో అది కాస్తా వైరల్ అయ్యి స్థానికంగా కలకలం సృష్టించింది. బహిరంగ ప్రదేశంలో మారణాయుధాలతో ఇలాంటి పనులు చేయడం పట్ల గ్రామస్తులు తీవ్ర ఆందోళన వ్యక్తం చేశారు.
స్థానికుల కథనం ప్రకారం.. ఈ యువకులు గతంలో కూడా ఇలాంటి అరాచకాలకు పాల్పడ్డారు. డిసెంబర్ 31 వేడుకల సమయంలోనూ మద్యం సేవించి గ్రామ వీధుల్లో తిరుగుతూ మహిళలు, వృద్ధులను భయపెట్టారని గ్రామస్తులు ఆరోపిస్తున్నారు. తాజాగా కనుమ పండుగ రోజున కూడా అర్ధరాత్రి వరకు పెద్ద శబ్దాలు చేస్తూ గ్రామంలో అశాంతి సృష్టించారు. యువత ఇలా బాధ్యతారాహిత్యంగా ప్రవర్తించడం పట్ల సర్వత్రా విమర్శలు వ్యక్తమవుతున్నాయి.
సోషల్ మీడియాలో వైరల్ అయిన వీడియో ఆధారంగా మచిలీపట్నం పోలీసులు సుమోటోగా కేసు నమోదు చేసి దర్యాప్తు ప్రారంభించారు. ఇప్పటికే ముగ్గురు యువకులను అదుపులోకి తీసుకుని పోలీస్ స్టేషన్కు తరలించి విచారిస్తున్నారు. పండుగలు, వేడుకల పేరుతో శాంతి భద్రతలకు విఘాతం కలిగిస్తే సహించేది లేదని పోలీసులు హెచ్చరించారు. ఇలాంటి చర్యల వల్ల సమాజానికి తప్పుడు సంకేతాలు వెళ్తాయని, భవిష్యత్తులో ఇటువంటి ఘటనలు పునరావృతం కాకుండా కఠిన చర్యలు తీసుకుంటామని స్పష్టం చేశారు.
