తెలంగాణలో పర్యావరణ సమతుల్యతను కాపాడేందుకు కేంద్ర ప్రభుత్వం ‘నగర్ వన్ యోజన’ కింద మూడు జిల్లాల్లో ఆరు అర్బన్ ఫారెస్టుల ఏర్పాటుకు పచ్చజెండా ఊపింది. ఇందుకోసం మొత్తం రూ. 8.26 కోట్ల నిధులను మంజూరు చేయగా, తొలి విడతగా 70 శాతం నిధులను ఇప్పటికే విడుదల చేసింది. పట్టణ ప్రాంతాల్లో పెరుగుతున్న కాలుష్యాన్ని తగ్గించి, ప్రజలకు స్వచ్ఛమైన గాలిని అందించడమే లక్ష్యంగా కేంద్రం ఈ నిధులను కేటాయించింది.
ఈ కొత్త పట్టణ వనాలను ఆదిలాబాద్, మంచిర్యాల, మేడ్చల్-మల్కాజ్గిరి జిల్లాల్లో అభివృద్ధి చేయనున్నారు. ఆదిలాబాద్లోని మావళా, యాపల్గూడ; మంచిర్యాలలోని ఇందారం, చెన్నూర్; మేడ్చల్ జిల్లాలోని యెల్లంపేట, చెంగిచెర్లలో ఈ వనాలు ఏర్పాటు కానున్నాయి. ఈ ఫారెస్టుల్లో స్థానిక వృక్ష జాతులకు పెద్దపీట వేయడంతో పాటు, ప్రజల కోసం వాకింగ్ ట్రాక్లు, విశ్రాంతి కేంద్రాలు మరియు పచ్చని మైదానాలను అటవీ శాఖ అధికారులు అందుబాటులోకి తీసుకురానున్నారు.
గత ఏడాది డిసెంబర్లో ప్రకటించిన 14 అర్బన్ ఫారెస్టులకు అదనంగా ఇవి ఏర్పాటు కావడం విశేషం. మిగిలిన వికారాబాద్, భూపాలపల్లి, కొత్తగూడెం వంటి జిల్లాల్లో ప్రతిపాదించిన వనాలకు కూడా త్వరలోనే నిధులు విడుదలయ్యే అవకాశం ఉందని అధికారులు తెలిపారు. ఈ పట్టణ వనాల ఏర్పాటు ద్వారా తెలంగాణలోని ప్రధాన నగరాలు మరియు పట్టణాలు ‘గ్రీన్ సిటీ’లుగా రూపుదిద్దుకోనున్నాయి.
