తెలంగాణలో గత ప్రభుత్వం కేటాయించిన డబుల్ బెడ్రూం ఇళ్లలో అసలైన లబ్ధిదారులు ఉంటున్నారా లేదా అన్న విషయాన్ని తేల్చేందుకు కాంగ్రెస్ ప్రభుత్వం పక్కా వ్యూహాన్ని అమలు చేస్తోంది. తనిఖీల సమయంలో లబ్ధిదారులు అక్కడ ఉన్నట్లు నటించినా, వారి అసలు గుట్టును విప్పేందుకు అధికారులు ‘కరెంట్ బిల్లుల తనిఖీ’ అనే వినూత్న మార్గాన్ని ఎంచుకున్నారు. గత నాలుగు నెలల విద్యుత్ వినియోగాన్ని విశ్లేషించడం ద్వారా ఆ ఇళ్లలో ఎవరైనా నివసిస్తున్నారా లేదా అనే విషయాన్ని నిర్ధారిస్తున్నారు.
పైలట్ ప్రాజెక్టుగా రాంపల్లిలోని 2,200 ఇళ్లను తనిఖీ చేయగా, మెజారిటీ ఇళ్లలో నెలకు 50 యూనిట్ల కంటే తక్కువ విద్యుత్ వినియోగం జరిగినట్లు తేలింది. సాధారణంగా ఒక కుటుంబం నివసిస్తే కనీసం 150 నుంచి 200 యూనిట్ల విద్యుత్ ఖర్చవుతుంది, కానీ ఇంత తక్కువ రీడింగ్ ఉండటంతో ఆ ఇళ్లు కేవలం పేరుకే కేటాయించబడ్డాయని, లబ్ధిదారులు అక్కడ ఉండటం లేదని అధికారులు నిర్ధారించారు. అంతేకాకుండా, ప్రభుత్వ నిబంధనల ప్రకారం కారు లేదా ట్రాక్టర్ ఉన్నవారు ఈ పథకానికి అనర్హులు కాగా, మహేశ్వరం నియోజకవర్గంలోనే 165 మంది ధనవంతులకు ఇళ్లు దక్కినట్లు సర్వేలో వెల్లడైంది.
రాష్ట్రవ్యాప్తంగా అక్రమంగా ఇళ్లు పొందిన వారి నుంచి వాటిని స్వాధీనం చేసుకొని, ‘ఇందిరమ్మ ఇళ్ల’ పథకం కింద అర్హులైన నిజమైన పేదలకు కేటాయించాలని ప్రభుత్వం నిర్ణయించింది. ప్రస్తుతం గ్రేటర్ హైదరాబాద్ పరిధిలో ఖాళీగా ఉన్న 22,000 ఇళ్లతో పాటు, జిల్లాల్లో కూడా ప్రత్యేక యాప్ ద్వారా సర్వే నిర్వహించేందుకు హౌసింగ్ శాఖ సిద్ధమైంది. అక్రమ లబ్ధిదారులు ఆందోళన వ్యక్తం చేస్తున్నప్పటికీ, నిబంధనల ప్రకారం అనర్హులను తొలగించి, వచ్చే ఏడాది నాటికి పారదర్శక పద్ధతిలో ఇళ్ల పంపిణీ పూర్తి చేయాలని ప్రభుత్వం లక్ష్యంగా పెట్టుకుంది.
