తెలంగాణ భవన్లో జరిగిన మీడియా సమావేశంలో హరీశ్ రావు మాట్లాడుతూ, సింగరేణి సంస్థలో నిబంధనలకు విరుద్ధంగా టెండర్లు కేటాయిస్తున్నారని సంచలన ఆరోపణలు చేశారు. ముఖ్యమంత్రి రేవంత్ రెడ్డి తన బంధువులకు, ముఖ్యంగా తన బావమరిదికి నైనీ బొగ్గు గనుల కాంట్రాక్టులను కట్టబెట్టేందుకే ‘సైట్ విజిట్’ అనే కొత్త నిబంధనను తీసుకువచ్చారని ఆయన విమర్శించారు. ఈ భారీ స్కామ్పై తాము హైకోర్టును ఆశ్రయించడమే కాకుండా, సీబీఐ విచారణ జరిపించాలని కేంద్ర మంత్రి కిషన్ రెడ్డికి ఫిర్యాదు చేస్తామని స్పష్టం చేశారు.
రాష్ట్ర క్యాబినెట్ మంత్రుల మధ్య వాటాల పంచాయితీ నడుస్తోందని, ఈ గొడవల వల్ల ఐఏఎస్ అధికారులు, జర్నలిస్టులు బలిపశువులవుతున్నారని హరీశ్ రావు ఆవేదన వ్యక్తం చేశారు. మంత్రి కొండా సురేఖ పీఏ అరెస్ట్ ఉదంతం, సమ్మక్క సారక్క టెండర్ల విషయంలో మంత్రుల మధ్య గొడవలు, సినిమా టికెట్ల రేట్ల పెంపు వంటి అంశాలను ప్రస్తావిస్తూ ప్రభుత్వంపై విమర్శలు గుప్పించారు. రేవంత్ రెడ్డి ప్రభుత్వం కేవలం తమ వ్యక్తిగత ప్రయోజనాల కోసం వ్యాపారులను భయపెట్టి నిధులు వసూలు చేస్తోందని ఆయన ఆరోపించారు.
ఇదే క్రమంలో ముఖ్యమంత్రి రేవంత్ రెడ్డి చేసిన వ్యాఖ్యలకు హరీశ్ రావు కౌంటర్ ఇచ్చారు. బీఆర్ఎస్ పార్టీని బొందపెడితేనే ఎన్టీఆర్ ఆత్మ శాంతిస్తుందన్న సీఎం మాటలను తిప్పికొడుతూ, కాంగ్రెస్ పార్టీని భూస్థాపితం చేస్తేనే అసలైన శాంతి లభిస్తుందని వ్యాఖ్యానించారు. ఉపముఖ్యమంత్రి భట్టి విక్రమార్కపై వస్తున్న వార్తల వెనుక ఎవరున్నారో ప్రభుత్వం స్పష్టం చేయాలని, లేనిపక్షంలో ముఖ్యమంత్రికి, ఉపముఖ్యమంత్రికి మధ్య ఒప్పందాలు కుదిరాయని ప్రజలు భావించాల్సి ఉంటుందని హరీశ్ రావు పేర్కొన్నారు.
