స్విట్జర్లాండ్ పర్యటనలో భాగంగా జ్యూరిచ్లో ఏర్పాటు చేసిన తెలుగు డయాస్పోరా సమావేశంలో ముఖ్యమంత్రి చంద్రబాబు నాయుడు పాల్గొన్నారు. సుమారు 20 దేశాల నుండి తరలివచ్చిన తెలుగు వారిని ఉద్దేశించి ఆయన ప్రసంగిస్తూ, విదేశాల్లో ఉన్నా మన సంప్రదాయాలను పాటిస్తూ సంక్రాంతి వేడుకలు జరుపుకోవడం అభినందనీయమని కొనియాడారు. గతంలో తాను దావోస్కు వచ్చినప్పుడు భారతీయులే తక్కువగా ఉండేవారని, నేడు తెలుగు వారు ప్రపంచవ్యాప్తంగా ప్రతిభ చాటుతుండటం గర్వకారణమని ఆనందం వ్యక్తం చేశారు.
రాష్ట్ర అభివృద్ధి కోసం ₹22 లక్షల కోట్ల పెట్టుబడులను ఆకర్షించడం ద్వారా 20 లక్షల ఉద్యోగాలను సృష్టించడమే తమ ప్రభుత్వ ప్రధాన లక్ష్యమని చంద్రబాబు స్పష్టం చేశారు. ‘స్పీడ్ ఆఫ్ డూయింగ్ బిజినెస్’ విధానంతో ఇప్పటికే ఆర్సెలర్ మిట్టల్, గూగుల్, ఏఎం గ్రీన్ వంటి దిగ్గజ సంస్థల నుండి భారీ పెట్టుబడులు సాధించామని వివరించారు. ముఖ్యంగా కాకినాడలో గ్రీన్ అమోనియా ప్లాంట్, ఉక్కు పరిశ్రమ వంటి ప్రాజెక్టులు రాష్ట్ర రూపురేఖలను మార్చనున్నాయని ఆయన ధీమా వ్యక్తం చేశారు.
యువ నాయకత్వాన్ని ప్రోత్సహించడంలో భాగంగా లోకేష్, రామ్మోహన్ నాయుడు వంటి వారికి కీలక బాధ్యతలు ఇచ్చామని సీఎం తెలిపారు. ఏఐ (AI), క్వాంటం కంప్యూటింగ్, డ్రోన్ టెక్నాలజీ వంటి ఆధునిక రంగాల్లో ఆంధ్రప్రదేశ్ను అగ్రస్థానంలో నిలుపుతామని హామీ ఇచ్చారు. గత ఎన్నికల్లో ఎన్నార్టీలు (NRTs) చూపిన చొరవను కొనియాడుతూ, కూటమి విజయంలో వారి పాత్ర మరువలేనిదని పేర్కొన్నారు.
