బంగ్లాదేశ్లో గత ఏడాది కాలంగా మైనారిటీలపై జరుగుతున్న దాడులపై ఆ దేశ తాత్కాలిక ప్రధాని మహమ్మద్ యూనస్ కార్యాలయం స్పందించింది. అయితే, ఈ దాడుల్లో అత్యధికం వ్యక్తిగత కక్షలు లేదా నేరపూరిత స్వభావం ఉన్నవి మాత్రమేనని, వాటికి మతపరమైన రంగు పులమవద్దని ప్రభుత్వం పేర్కొనడం ఇప్పుడు చర్చనీయాంశమైంది.
బంగ్లాదేశ్ తాత్కాలిక ప్రభుత్వం విడుదల చేసిన నివేదిక ప్రకారం, గతేడాది మైనారిటీలకు సంబంధించి మొత్తం 645 ఘటనలు నమోదయ్యాయి. వీటిలో కేవలం 71 ఘటనలు (సుమారు 11%) మాత్రమే మతపరమైన ఉద్దేశ్యంతో జరిగినట్లు ప్రభుత్వం గుర్తించింది. మిగిలిన 574 ఘటనలు భూ వివాదాలు, వ్యక్తిగత శత్రుత్వం, దొంగతనాలు లేదా ఇతర సామాజిక కారణాల వల్ల జరిగినవేనని ప్రభుత్వం స్పష్టం చేసింది. మతపరమైన ఘటనల్లో 38 ఆలయాలపై దాడులు జరిగినట్లు పేర్కొంటూ, వీటిపై ఇప్పటికే 50 కేసులను నమోదు చేసినట్లు వెల్లడించింది.
అయితే, ప్రభుత్వం ఇచ్చిన ఈ వివరణను ‘బంగ్లాదేశ్ హిందూ, బుద్ధిస్ట్, క్రిస్టియన్ యూనిటీ కౌన్సిల్’ తీవ్రంగా ఖండించింది. ప్రభుత్వం దాడులను తక్కువ చేసి చూపడం వల్ల నేరస్థులకు ధైర్యం పెరుగుతుందని, ఇది భవిష్యత్తులో మరిన్ని దాడులకు దారితీస్తుందని ఆందోళన వ్యక్తం చేసింది. గత మూడు వారాల్లోనే 10 మందికి పైగా హిందువులు హత్యకు గురయ్యారని గుర్తు చేస్తూ, ఫిబ్రవరి 12న జరగబోయే సాధారణ ఎన్నికల ముందు మైనారిటీలను భయభ్రాంతులకు గురిచేసే కుట్రలో భాగంగానే ఈ హింస జరుగుతోందని కౌన్సిల్ ఆరోపించింది.
బంగ్లాదేశ్లో హిందువుల భద్రతపై భారత విదేశీ వ్యవహారాల మంత్రిత్వ శాఖ ఇప్పటికే పలుమార్లు తన ఆందోళనను వ్యక్తం చేస్తూ, మైనారిటీల రక్షణకు కఠిన చర్యలు తీసుకోవాలని కోరింది. 2024 ఆగస్టులో రాజకీయ మార్పు జరిగినప్పటి నుండి అక్కడ అస్థిరత కొనసాగుతోంది. ఈ క్రమంలోనే బాధితులకు న్యాయం చేయాలని అంతర్జాతీయ మానవ హక్కుల సంఘాలు కూడా బంగ్లాదేశ్పై ఒత్తిడి తెస్తున్నాయి.
