సంక్రాంతి పండుగ వేళ నగరాన్ని వణికిస్తున్న చైనా మాంజా (సింథటిక్ దారం) వినియోగంపై తెలంగాణ రాష్ట్ర మానవ హక్కుల కమిషన్ (HRC) తీవ్రంగా స్పందించింది. పర్యావరణానికే కాకుండా మనుషులు, పక్షుల ప్రాణాలకు ముప్పు కలిగిస్తున్న ఈ ప్రమాదకరమైన దారం వాడకంపై వివరణ ఇవ్వాలని హైదరాబాద్ పోలీస్ కమిషనర్ వి.సి. సజ్జనార్కు నోటీసులు జారీ చేసింది. మాంజా అమ్మకాలను అరికట్టేందుకు పోలీసులు తీసుకుంటున్న చర్యలపై ఫిబ్రవరి 26 లోపు సమగ్ర నివేదిక సమర్పించాలని కమిషన్ ఆదేశించింది.
చైనా మాంజా అనేది సాధారణ నూలు దారంలా కాకుండా నైలాన్ లేదా సింథటిక్ పదార్థంతో తయారవుతుంది. దీనిపై గాజు ముక్కల పొడి పూత ఉండటం వల్ల ఇది కత్తి కంటే పదునుగా మారి, గాలిలో ఎగిరే పక్షులతో పాటు ద్విచక్ర వాహనాలపై వెళ్లే వారి మెడకు తగిలితే ప్రాణాలు తీస్తోంది. గత కొన్ని రోజులుగా నగరంలో ఇటువంటి ఘోర ప్రమాదాలు జరిగి కొందరు మృత్యువాత పడగా, తాజాగా ఒక పోలీస్ అధికారి కూడా తీవ్రంగా గాయపడ్డారు. ఈ నేపథ్యంలోనే న్యాయవాదులు హెచ్ఆర్సీని ఆశ్రయించి పోలీసుల వైఫల్యంపై ఫిర్యాదు చేశారు.
మరోవైపు, పోలీసులు ఇప్పటికే నగరవ్యాప్తంగా ముమ్మర తనిఖీలు నిర్వహిస్తూ లక్షల రూపాయల విలువైన నిషేధిత మాంజాను స్వాధీనం చేసుకుంటున్నారు. చైనా మాంజా విక్రయించే వ్యాపారులపై క్రిమినల్ కేసులు నమోదు చేస్తామని సీపీ సజ్జనార్ హెచ్చరించారు. తల్లిదండ్రులు తమ పిల్లలకు కేవలం సురక్షితమైన నూలు దారాన్ని మాత్రమే కొనివ్వాలని, ప్రాణాపాయానికి కారణమయ్యే ఈ మాంజాకు దూరంగా ఉండాలని అధికారులు విజ్ఞప్తి చేస్తున్నారు.
