ప్రముఖ ట్రావెల్ యూట్యూబర్ ‘నా అన్వేషణ’ అన్వేష్ మరోసారి వివాదంలో చిక్కుకున్నారు. భారత పాస్పోర్టుపై ఆయన చేసిన కొన్ని అనుచిత వ్యాఖ్యలపై సినీ నటి కరాటే కల్యాణి తీవ్రస్థాయిలో విరుచుకుపడ్డారు. అన్వేష్ భారత పాస్పోర్టును ఉద్దేశించి ‘దరిద్రపు పాస్పోర్టు’ అని వ్యాఖ్యానించడం దేశ గౌరవాన్ని కించపరచడమేనని ఆమె మండిపడ్డారు. ఈ మేరకు మంగళవారం ఆమె పోలీసులకు ఫిర్యాదు చేస్తూ, విదేశాల్లో దేశ ప్రతిష్టను దిగజార్చేలా మాట్లాడుతున్న అన్వేష్పై కఠిన చర్యలు తీసుకోవాలని డిమాండ్ చేశారు.
భారతదేశ పౌరుడికి పాస్పోర్టు అనేది కేవలం ప్రయాణ పత్రం మాత్రమే కాదని, అది ఒక గుర్తింపు అని కల్యాణి పేర్కొన్నారు. పాస్పోర్టుపై భారత ప్రభుత్వ రాజముద్ర ఉంటుందని, దానికి ఎంతో విలువ మరియు గౌరవం ఉంటాయని ఆమె గుర్తు చేశారు. విదేశాల్లో ఉన్నప్పుడు మనకు రక్షణ కల్పించేది అదేనని, అలాంటి పవిత్రమైన పత్రాన్ని దూషించడం క్షమించరాని నేరమని ఆగ్రహం వ్యక్తం చేశారు. విదేశీ ఎయిర్పోర్టుల్లో తనిఖీల కోసం వేచి చూడాల్సి రావడం సహజమని, దానికి పాస్పోర్టును నిందించడం సరికాదని ఆమె హితవు పలికారు.
అన్వేష్ పాస్పోర్టును తక్షణమే రద్దు చేసేలా అధికారులు చర్యలు తీసుకోవాలని కరాటే కల్యాణి కోరారు. అన్వేష్ భారతదేశంలో అడుగుపెట్టిన వెంటనే చట్టపరమైన పరిణామాలు ఎదుర్కోవాల్సి ఉంటుందని హెచ్చరించారు. గతంలో కూడా వీరిద్దరి మధ్య సామాజిక అంశాలపై వాదోపవాదాలు జరగగా, తాజా పాస్పోర్టు వివాదం సోషల్ మీడియాలో పెద్ద ఎత్తున చర్చకు దారితీసింది. నెటిజన్లు కూడా ఈ విషయంలో భిన్నాభిప్రాయాలు వ్యక్తం చేస్తున్నారు.
