ఉత్తరప్రదేశ్లోని ప్రయాగ్రాజ్లో డేటింగ్ యాప్ కేంద్రంగా జరిగినట్లు ఆరోపణలు వస్తున్న ఓ మోసం వ్యవహారం కలకలం రేపుతోంది. పోలీసులు, అధికారులు ఎప్పటికప్పుడు సైబర్ మోసాలపై అప్రమత్తం చేస్తున్నప్పటికీ.. కొందరు నిందితుల వలలో చిక్కుకుంటూనే ఉన్నారు. తాజాగా ఓ మహిళ టిండర్, సోషల్ మీడియా ద్వారా పలువురు పురుషులతో పరిచయం పెంచుకుని, ఆ తర్వాత వారిని బ్లాక్మెయిల్ చేసినట్లు ఆరోపణలు వెలుగులోకి వచ్చాయి.
ఫిర్యాదులో పేర్కొన్న వివరాల ప్రకారం.. సదరు మహిళ మొదట పురుషులతో సోషల్ మీడియా, డేటింగ్ యాప్ ద్వారా స్నేహం చేసేదని, అనంతరం వారితో సన్నిహితంగా మెలిగి ప్రైవేట్ ఫొటోలు, వీడియోలు తీసేదని ఆరోపించారు. ఆ తర్వాత వాటిని చూపిస్తూ డబ్బులు ఇవ్వాలని బెదిరించినట్లు ఫిర్యాదులో పేర్కొన్నారు. ఈ విధంగా పలువురు బాధితుల నుంచి మొత్తంగా రూ.6 కోట్లకు పైగా వసూలు చేసినట్లు ఓ హైకోర్టు న్యాయవాది పోలీసులకు ఫిర్యాదు చేసినట్లు సమాచారం.
ఈ ఆరోపణలు ప్రస్తుతం సంచలనంగా మారినప్పటికీ.. వీటిలోని నిజానిజాలు ఇంకా నిర్ధారణ కాలేదు. ఫిర్యాదు ఆధారంగా పోలీసులు దర్యాప్తు చేపట్టినట్లు తెలుస్తోంది. డేటింగ్ యాప్స్, సోషల్ మీడియా ద్వారా పరిచయం అయ్యే వ్యక్తులతో వ్యక్తిగత సమాచారాన్ని, ప్రైవేట్ ఫొటోలు, వీడియోలను పంచుకునే విషయంలో అప్రమత్తంగా ఉండాలని నిపుణులు సూచిస్తున్నారు. దర్యాప్తు పూర్తయిన తర్వాతే ఈ వ్యవహారంలో అసలు వాస్తవాలు వెలుగులోకి వచ్చే అవకాశం ఉంది.
