అమెరికా-ఇజ్రాయెల్ దాడులకు ప్రతీకారంగా ఇరాన్ హర్మూజ్ జలసంధిని తన అదుపులోకి తీసుకోవడంతో గత రెండు వారాలుగా అంతర్జాతీయ నౌకల రాకపోకలు స్తంభించిపోయాయి. ఈ కీలక జలసంధి గుండా ప్రయాణించే పశ్చిమ దేశాల నౌకలను అడ్డుకుంటామని ఇరాన్ హెచ్చరించిన నేపథ్యంలో, అనేక భారతీయ నౌకలు కూడా అక్కడ నిలిచిపోయాయి. అయితే, భారత్ మరియు చైనా నౌకలకు ఇరాన్ సైన్యం మినహాయింపు ఇవ్వడంతో, ఒమన్లోని సోహార్ ఓడరేవులో చిక్కుకున్న భారతీయ ఆయిల్ ట్యాంకర్ ‘జగ్ ప్రకాశ్’ ఎట్టకేలకు ఆఫ్రికా వైపు తన ప్రయాణాన్ని ప్రారంభించింది.
కేంద్ర నౌకాయాన మంత్రిత్వ శాఖ సమాచారం ప్రకారం, ప్రస్తుతం ఈ జలసంధి ప్రాంతంలో మొత్తం 23 భారతీయ నౌకలు చిక్కుకున్నాయి. జలసంధికి తూర్పున ఒమన్ వైపు జగ్ ప్రకాశ్తో పాటు మరో మూడు నౌకలు ఉండగా, పశ్చిమ వైపు పర్షియన్ గల్ఫ్లో 24 నౌకలు నిలిచిపోయినట్లు అధికారులు వెల్లడించారు. ఈ నౌకల్లో సుమారు 700 మందికి పైగా భారతీయ నావికులు ఉన్నారని, వారి భద్రతపై ప్రభుత్వం నిరంతరం పర్యవేక్షిస్తోందని ప్రత్యేక కార్యదర్శి రాజేశ్ కుమార్ సిన్హా తెలిపారు.
మరోవైపు, ఇరాన్ తన భూభాగంపై జరిగిన దాడులకు నిరసనగా ప్రపంచ ఆర్థిక వ్యవస్థను దెబ్బతీయడమే లక్ష్యంగా హర్మూజ్ జలసంధిని మూసివేస్తామని ప్రకటించింది. ఈ యుద్ధ వాతావరణం వల్ల ఇప్పటివరకు సుమారు 20 నౌకలపై దాడులు జరిగినట్లు నివేదికలు అందుతున్నాయి. ఇరాన్ కొత్త సుప్రీం నాయకుడు అయతుల్లా మోజ్తాబా ఖమేనీ తన తొలి ప్రకటనలోనే అమెరికా, ఇజ్రాయెల్లకు వ్యతిరేకంగా కఠినంగా వ్యవహరిస్తామని స్పష్టం చేయడంతో, ఈ ప్రాంతంలో ప్రయాణించే నౌకల భద్రతపై అంతర్జాతీయ సమాజంలో ఆందోళన పెరుగుతోంది.
