కృష్ణా జిల్లా సూరంపల్లిలో జరిగిన ‘అన్నదాత సుఖీభవ’ బహిరంగ సభలో ముఖ్యమంత్రి నారా చంద్రబాబు నాయుడు పాల్గొన్నారు. ఈ వేదికగా ఉగాది పండుగకు ముందే రైతులకు పెట్టుబడి సాయాన్ని విడుదల చేస్తూ, సుమారు 46.85 లక్షల మంది రైతుల ఖాతాల్లో రూ. 2,808 కోట్లను నేరుగా జమ చేశారు. ఈ సందర్భంగా ఆయన మాట్లాడుతూ రైతు సంక్షేమంపై తన నిబద్ధతను చాటుకోవడమే కాకుండా, రాష్ట్రంలో కలకలం రేపిన కల్తీ నెయ్యి ఉదంతంపై గత పాలకుల తీరును తీవ్రంగా ఎండగట్టారు.
తిరుమల లడ్డూ ప్రసాదం తయారీలో కల్తీ నెయ్యిని వాడటంపై ముఖ్యమంత్రి తీవ్ర ఆవేదన, ఆగ్రహం వ్యక్తం చేశారు. గత ప్రభుత్వంలో స్వార్థం కోసం సాక్షాత్తు ఆ దేవుడి సేవలనే అపవిత్రం చేశారని, కోట్లాది మంది భక్తుల మనోభావాలను దెబ్బతీశారని ఆయన మండిపడ్డారు. ప్రస్తుతం అసెంబ్లీలో ఈ విషయంపై చర్చ జరుగుతుంటే, వాస్తవాలు బయటకు రాకుండా విపక్షాలు కుట్రలు చేస్తున్నాయని ఆరోపిస్తూ, భక్తుల నమ్మకాన్ని వమ్ము చేసిన ఏ ఒక్కరినీ వదిలిపెట్టే ప్రసక్తే లేదని బాధ్యులపై కఠిన చర్యలు తీసుకుంటామని హెచ్చరించారు.
రైతు సంక్షేమమే తమ ప్రభుత్వ ప్రథమ ప్రాధాన్యమని చంద్రబాబు ఈ సందర్భంగా స్పష్టం చేశారు. కేంద్రం ఇచ్చే రూ. 2 వేలకు రాష్ట్ర ప్రభుత్వం రూ. 4 వేలు కలిపి, మొత్తం రూ. 6 వేల చొప్పున పెట్టుబడి సాయాన్ని నేరుగా రైతుల ఖాతాల్లోకి పంపినట్లు వివరించారు. ధాన్యం కొనుగోలు చేసిన 24 గంటల్లోనే చెల్లింపులు చేస్తున్నామని చెబుతూ, రైతుల కష్టాలు తెలిసిన వాడిగా వారిని ప్రతి అడుగులోనూ ఆదుకుంటామని అన్నదాతలకు భరోసా ఇచ్చారు.
