తెలంగాణ విద్యుత్ రంగంలో రేవంత్ రెడ్డి ప్రభుత్వం కీలక సంస్కరణకు శ్రీకారం చుట్టింది. రాష్ట్రంలో ఇప్పటికే ఉన్న టీజీఎస్పీడీసీఎల్ (సదరన్), టీజీఎన్పీడీసీఎల్ (నార్తర్న్) డిస్కమ్లకు తోడుగా, తాజాగా మూడో డిస్కమ్ను ఏర్పాటు చేస్తూ బుధవారం అధికారిక ఉత్తర్వులు జారీ చేసింది. దీనికి తెలంగాణ రైతు పవర్ డిస్ట్రిబ్యూషన్ కంపెనీ లిమిటెడ్ (TGRPDCL) అని పేరు పెట్టారు. ఈ కొత్త సంస్థకు ఛైర్మన్ మరియు మేనేజింగ్ డైరెక్టర్గా సీనియర్ ఐఏఎస్ అధికారి ముషారఫ్ అలీ ఫరూఖీని నియమించింది.
ఈ కొత్త డిస్కం ప్రధానంగా రాష్ట్రంలోని వ్యవసాయ అవసరాలు మరియు భారీ ప్రాజెక్టుల విద్యుత్ పంపిణీని పర్యవేక్షించనుంది. రైతుల వ్యవసాయ కనెక్షన్లు, ఉచిత విద్యుత్ సరఫరా, కొత్త కనెక్షన్ల మంజూరుతో పాటు రాష్ట్రంలోని భారీ ఎత్తిపోతల పథకాలు, మిషన్ భగీరథ, మున్సిపల్ వాటర్ సప్లై మరియు హైదరాబాద్ మెట్రో వాటర్ వర్క్స్ వంటి కీలక విభాగాల విద్యుత్ అవసరాలను ఈ టీజీఆర్పీడీసీఎల్ తీర్చనుంది. కార్యకలాపాల నిర్వహణ కోసం సీఎండీతో పాటు మరో నలుగురు డైరెక్టర్లను ప్రభుత్వం కేటాయించింది.
సాధారణ వినియోగదారులు మరియు పరిశ్రమల విద్యుత్ అవసరాల నుండి వ్యవసాయం, సాగునీటి ప్రాజెక్టులను వేరు చేయడం ద్వారా విద్యుత్ సరఫరాలో మరింత పారదర్శకత, నాణ్యత పెరుగుతుందని ప్రభుత్వం భావిస్తోంది. ముఖ్యంగా రైతులకు విద్యుత్ కోతలు లేకుండా చూడటం, ప్రాజెక్టుల నిర్వహణను మెరుగుపరచడం ఈ నిర్ణయం వెనుక ఉన్న ప్రధాన ఉద్దేశ్యం. తెలంగాణ రాష్ట్రం ఏర్పడిన తర్వాత విద్యుత్ పంపిణీ వ్యవస్థలో చేపట్టిన అతిపెద్ద మార్పుగా దీనిని పేర్కొంటున్నారు.
