ముంబయి మేయర్ అభ్యర్థిగా బీజేపీ కార్పొరేటర్ రీతూ తావ్డేను, డిప్యూటీ మేయర్ అభ్యర్థిగా శివసేన (ఏకనాథ్ షిండే వర్గం) కార్పొరేటర్ సంజయ్ శంకర్ ఘడీని అధికార కూటమి ప్రకటించింది. గత నెలలో జరిగిన బీఎంసీ ఎన్నికల్లో 89 స్థానాలతో బీజేపీ అతిపెద్ద పార్టీగా అవతరించినప్పటికీ, మేయర్ పీఠం కోసం షిండే వర్గం పట్టుబట్టడంతో రాజకీయ అనిశ్చితి నెలకొంది. చివరకు హైకమాండ్ చర్చల అనంతరం, మేయర్ పదవిని బీజేపీకి వదిలివేసేందుకు షిండే అంగీకరించారు. మేయర్గా ప్రతిపాదించబడిన రీతూ తావ్డే గతంలో మూడుసార్లు కార్పొరేటర్గా గెలిచి, విద్యా కమిటీ ఛైర్మన్గా పనిచేసిన అనుభవం ఉన్న నేత.
మొత్తం 227 స్థానాలున్న బీఎంసీలో బీజేపీ-శివసేన (మహాయుతి) కూటమి 118 స్థానాలతో స్పష్టమైన మెజారిటీని సాధించింది. మరోవైపు ఉద్ధవ్ ఠాక్రే నేతృత్వంలోని శివసేన (UBT) 65 స్థానాలకే పరిమితమైంది. 1997 నుండి ముంబయి మున్సిపల్ కార్పొరేషన్ పీఠంపై శివసేన జెండా ఎగురుతూ ఉండగా, తాజా పరిణామాలతో తొలిసారిగా ఒక బీజేపీ అభ్యర్థి ఈ అత్యున్నత పదవిని అధిష్టించబోతున్నారు. డిప్యూటీ మేయర్ పదవిని దక్కించుకున్న షిండే వర్గానికి చెందిన సంజయ్ ఘడీ సుమారు 15 నెలల పాటు ఆ పదవిలో కొనసాగే అవకాశం ఉంది.
ఎన్నికల ఫలితాల తర్వాత షిండే తన కార్పొరేటర్లను రిసార్ట్కు తరలించి ‘క్యాంపు రాజకీయాలు’ నడిపినప్పటికీ, కూటమి ధర్మాన్ని కాపాడేందుకు చివరకు సర్దుబాటు చేసుకున్నారు. ఈ నెల 11న మధ్యాహ్నం జరగబోయే అధికారిక ఎన్నికతో ముంబయి పాలనలో కొత్త అధ్యాయం మొదలుకానుంది. ఫిబ్రవరి 7న అధికారికంగా నామినేషన్లు దాఖలు చేసిన ఈ అభ్యర్థుల గెలుపు దాదాపు ఖాయంగా కనిపిస్తోంది.
