అమెరికా న్యాయశాఖ విడుదల చేసిన రహస్య పత్రాలను ఉటంకిస్తూ ‘బ్లూమ్బర్గ్’ ఒక సంచలన నివేదికను ప్రచురించింది. దీని ప్రకారం, 2017 నుండి 2019 మధ్య కాలంలో రిలయన్స్ గ్రూప్ అధినేత అనిల్ అంబానీ మరియు జెఫ్రీ ఎప్స్టీన్ మధ్య సన్నిహిత సందేశాలు (Messages) సాగినట్లు తెలుస్తోంది. వీరిద్దరూ ప్రపంచ రాజకీయాలు, వ్యాపార వ్యవహారాలతో పాటు వ్యక్తిగత కలయికల గురించి కూడా చర్చించుకున్నట్లు ఆరోపణలు వస్తున్నాయి. ముఖ్యంగా అంబానీ కుటుంబం మరియు వారి వ్యాపార సామ్రాజ్యంపై అవగాహన పెంచుకోవడానికి ఎప్స్టీన్ పలు పుస్తకాలను కూడా ఆర్డర్ చేసినట్లు ఈ నివేదిక వెల్లడించింది.
ఈ నివేదికలోని అత్యంత వివాదాస్పదమైన అంశం ఏమిటంటే, 2017 మార్చిలో జరిగిన ఒక సంభాషణలో.. అనిల్ అంబానీ పర్యటన కోసం ఒక ‘అందమైన స్వీడన్ మహిళను’ ఏర్పాటు చేస్తానని ఎప్స్టీన్ ప్రతిపాదించగా, దానికి అంబానీ వెంటనే అంగీకరించినట్లు పత్రాల్లో ఉన్నట్లు సమాచారం. అలాగే, 2018లో పారిస్లో మరియు 2019లో న్యూయార్క్లోని ఎప్స్టీన్ నివాసంలో వీరిద్దరూ సమావేశం కావాలని ప్రణాళికలు వేసుకున్నట్లు సందేశాలు స్పష్టం చేస్తున్నాయి. ఎప్స్టీన్ సహాయకులు కూడా మన్హట్టన్లోని ఆయన ఇంట్లో అంబానీతో సమావేశం జరిగినట్లు ధ్రువీకరించినట్లు నివేదిక పేర్కొంది.
జెఫ్రీ ఎప్స్టీన్ తన పరపతిని పెంచుకోవడానికి మైనర్ బాలికలను ప్రముఖులకు ఎరగా వేసినట్లు 2008లోనే నేరాన్ని అంగీకరించారు. అటువంటి వ్యక్తితో భారతీయ దిగ్గజ పారిశ్రామికవేత్తకు సంబంధాలు ఉన్నాయనే వార్త ఇప్పుడు కార్పొరేట్ మరియు రాజకీయ వర్గాల్లో హాట్ టాపిక్గా మారింది. అయితే, ఈ ఆరోపణలపై స్పందించడానికి అనిల్ అంబానీ ప్రతినిధులు నిరాకరించారు. ఈ వ్యవహారం మున్ముందు ఇంకెన్ని మలుపులు తిరుగుతుందో వేచి చూడాలి.
