ఒక మహిళను తన ఇష్టానికి వ్యతిరేకంగా గర్భాన్ని కొనసాగించమని బలవంతం చేయలేమని సుప్రీంకోర్టు స్పష్టం చేసింది. 18 ఏళ్ల ఒక యువతి (గర్భం దాల్చినప్పుడు టీనేజర్) 30 వారాల గర్భాన్ని తొలగించుకోవడానికి జస్టిస్ బి.వి. నాగరత్న నేతృత్వంలోని ధర్మాసనం అనుమతించింది. గతంలో బాంబే హైకోర్టు ఈ అభ్యర్థనను తిరస్కరిస్తూ, బిడ్డకు జన్మనిచ్చిన తర్వాత దత్తత ఇవ్వవచ్చని సూచించింది. అయితే, హైకోర్టు ఉత్తర్వులను సుప్రీంకోర్టు తప్పుబట్టింది. మాతృత్వం అనేది ఒక మహిళ స్వయంప్రతిపత్తికి సంబంధించిన అంశమని, పుట్టబోయే బిడ్డ హక్కుల పేరుతో తల్లి ఇష్టాన్ని కాదనలేమని కోర్టు అభిప్రాయపడింది.
ఈ కేసులో బాధితురాలు తన స్నేహితుడి కారణంగా గర్భం దాల్చింది. అయితే అబార్షన్ గురించి నిర్ణయం తీసుకోవడంలో జాప్యం జరగడంతో గర్భం 30 వారాలకు చేరుకుంది. పెళ్లి కాకుండా బిడ్డకు జన్మనివ్వడం వల్ల సమాజంలో ఎదుర్కోవాల్సిన వివక్ష, అలాగే బలవంతంగా గర్భాన్ని మోయడం వల్ల కలిగే తీవ్ర మానసిక వేదనను ఆమె తరఫు న్యాయవాది కోర్టుకు వివరించారు. మెడికల్ బోర్డు నివేదికను పరిశీలించిన ధర్మాసనం, గర్భవిచ్ఛిత్తి వల్ల యువతి ప్రాణాలకు ఎలాంటి ముప్పు లేదని నిర్ధారించుకున్నాక ఈ సంచలన తీర్పు ఇచ్చింది. ఆమె మానసిక, శారీరక క్షేమాన్ని దృష్టిలో ఉంచుకుని ఈ నిర్ణయం తీసుకున్నట్లు కోర్టు పేర్కొంది.
భారతదేశంలోని ‘మెడికల్ టర్మినేషన్ ఆఫ్ ప్రెగ్నెన్సీ’ (MTP) చట్టం ప్రకారం, గర్భవిచ్ఛిత్తికి కొన్ని నిర్దిష్ట నిబంధనలు ఉన్నాయి. సాధారణంగా 20 వారాల వరకు వైద్యుల సలహాతో అబార్షన్ చేసుకోవచ్చు. 20 నుండి 24 వారాల మధ్య ప్రత్యేక పరిస్థితుల్లో అనుమతి ఉంటుంది. కానీ 24 వారాలు దాటిన తర్వాత కేవలం తల్లి ప్రాణానికి ముప్పు ఉన్నప్పుడు లేదా పిండంలో తీవ్రమైన లోపాలు ఉన్నప్పుడు మాత్రమే కోర్టు అనుమతితో అబార్షన్ చేయించుకోవాలి. ఈ కేసులో 30 వారాల గర్భానికి అనుమతి ఇవ్వడం ద్వారా సుప్రీంకోర్టు మహిళల పునరుత్పత్తి హక్కులకు (Reproductive Rights) పెద్దపీట వేసింది.
