తెలంగాణలో మున్సిపల్ ఎన్నికల నగారా మోగడంతో రాజకీయ వాతావరణం ఒక్కసారిగా వేడెక్కింది. జగిత్యాల జిల్లా మెట్పల్లిలో కాంగ్రెస్ పార్టీకి షాక్ తగిలింది. ఎనిమిదేళ్లుగా పార్టీ కోసం కష్టపడి పనిచేస్తున్న తనకు మున్సిపల్ ఎన్నికల్లో పోటీ చేసేందుకు టికెట్ ఇవ్వలేదని మెట్పల్లి పట్టణ కాంగ్రెస్ మహిళా అధ్యక్షురాలు హరిత తీవ్ర ఆవేదన వ్యక్తం చేశారు. నిన్నటి వరకు టికెట్ ఇస్తామని నమ్మబలికి, తీరా సమయం వచ్చేసరికి మొండిచేయి చూపించారని ఆమె మాజీ మంత్రి జీవన్ రెడ్డి నివాసం వద్ద వెక్కి వెక్కి ఏడ్చారు.
ముఖ్యంగా 24వ వార్డు నుంచి పోటీ చేయాలని ఆశించిన హరితను పక్కన పెట్టి, ఇటీవల పార్టీలో చేరిన గణేష్కు టికెట్ కేటాయించడంపై ఆమె ఆగ్రహం వ్యక్తం చేశారు. “నిన్న రాత్రి దాకా నాకు టికెట్ ఇస్తామని చెప్పారు, ఇప్పుడు లేదంటున్నారు. పార్టీ కోసం ఇన్నేళ్లుగా పనిచేసిన మాకు ఇచ్చే గౌరవం ఇదేనా?” అంటూ ఆమె కన్నీటి పర్యంతమయ్యారు. ఈ ఘటనకు సంబంధించిన వీడియో సోషల్ మీడియాలో వైరల్గా మారింది, ఇది కాంగ్రెస్ శ్రేణుల్లో పెద్ద చర్చకు దారితీసింది.
జగిత్యాల మున్సిపల్ రాజకీయాలు ప్రస్తుతం జీవన్ రెడ్డి మరియు ఎమ్మెల్యే డాక్టర్ సంజయ్ వర్గాల మధ్య ఆధిపత్య పోరుగా మారాయి. జీవన్ రెడ్డి తన అనుచరులకు టికెట్లు దక్కడం లేదని అసంతృప్తితో ఉండగా, పార్టీలో కొత్తగా చేరిన వారికి ప్రాధాన్యత ఇవ్వడంపై పాత క్యాడర్ గుర్రుగా ఉంది. టికెట్ల లొల్లి ముదిరితే రెబల్స్ రూపంలో పార్టీకి నష్టం తప్పదని రాజకీయ విశ్లేషకులు భావిస్తున్నారు. ఈ అసమ్మతి జ్వాలలను అధిష్టానం ఎలా చల్లారుస్తుందో వేచి చూడాలి.
