భారతీయ రైల్వే ప్రతిష్టాత్మకంగా ప్రారంభించిన కామాఖ్య – హౌరా వందే భారత్ స్లీపర్ రైలులో నాన్-వెజ్ ప్రియులకు రైల్వే శాఖ తీపి కబురు అందించింది. ఈ రైలు ప్రారంభమైన కొత్తలో కేవలం శాకాహార భోజనాన్ని మాత్రమే అందించడంపై ప్రయాణికుల నుంచి పెద్ద ఎత్తున విమర్శలు రావడంతో పాటు, విపక్షాలు కూడా దీనిపై అభ్యంతరం వ్యక్తం చేశాయి. ప్రయాణికుల నుంచి వచ్చిన భారీ విజ్ఞప్తులు మరియు ఫీడ్బ్యాక్ను పరిగణనలోకి తీసుకున్న రైల్వే మంత్రి అశ్వినీ వైష్ణవ్, మెనూలో మార్పులు చేస్తూ మాంసాహారాన్ని అందుబాటులోకి తెస్తున్నట్లు ప్రకటించారు.
తాజా మార్పుల ప్రకారం, వెజ్ మెనూలోని పన్నీర్ మసాలా స్థానంలో ఇప్పుడు నాన్-వెజ్ ప్రియుల కోసం ప్రత్యేకంగా అస్సామీ స్టైల్ చికెన్ కర్రీని ప్రవేశపెట్టారు. ఈ భోజనంలో 50 నుండి 60 గ్రాముల బోన్లెస్ చికెన్తో పాటు 70 గ్రాముల గ్రేవీని అందిస్తారు. దీనితో పాటు జీరా కార్న్ పులావ్, పరాఠా, దాల్, బీన్స్ కర్రీ మరియు డెజర్ట్గా బెంగాలీ రసగుల్లా ఉండనున్నాయి. అయితే నాన్-వెజ్ విభాగంలో కేవలం చికెన్కు మాత్రమే అనుమతినిచ్చిన ఐఆర్సీటీసీ (IRCTC), ఇతర వంటకాల్లో ఎలాంటి మార్పులు ఉండబోవని స్పష్టం చేసింది.
టికెట్ బుకింగ్ సమయంలోనే ప్రయాణికులు తమ ఆహార ప్రాధాన్యతను (వెజ్ లేదా నాన్-వెజ్) ఎంచుకునేలా సాఫ్ట్వేర్లో అవసరమైన మార్పులు చేయాలని రైల్వే బోర్డును అధికారులు కోరారు. జనవరి 17న ప్రధాని మోదీ చేతుల మీదుగా ప్రారంభమైన ఈ తొలి వందే భారత్ స్లీపర్ రైలులో ఫిబ్రవరి మొదటి వారం నుండి ఈ కొత్త మెనూ అమల్లోకి వచ్చింది. కేవలం ఆహారమే కాకుండా, ప్రయాణ సౌలభ్యం మరియు వేగంలో మేటిగా నిలుస్తున్న ఈ రైలులో భోజనం విషయంలో తీసుకున్న ఈ నిర్ణయం పట్ల ప్రయాణికులు హర్షం వ్యక్తం చేస్తున్నారు.
