బారామతి విమాన ప్రమాదంపై ప్రాథమిక విచారణ జరిపిన డైరెక్టర్ జనరల్ ఆఫ్ సివిల్ ఏవియేషన్ (DGCA) సంచలన విషయాలను వెల్లడించింది. ప్రమాదానికి ముందు పైలట్లు రన్వేను గుర్తించడంలో తీవ్ర ఇబ్బందులు పడ్డారని స్పష్టం చేసింది. విమానాన్ని ల్యాండ్ చేసే క్రమంలో రన్వే స్పష్టంగా కనిపించకపోవడంతో, పైలట్లు మొదటి ప్రయత్నాన్ని విరమించుకుని గాల్లోనే చక్కర్లు కొట్టారని (Go-around) డీజీసీఏ పేర్కొంది. అయితే, అత్యంత ఆశ్చర్యకరమైన విషయం ఏమిటంటే.. విమానం ప్రమాదానికి గురయ్యే ముందు పైలట్ల నుంచి ఎటువంటి ‘మేడే’ (Mayday – అత్యవసర స్థితిని తెలిపే పిలుపు) కాల్స్ రాకపోవడం ఇప్పుడు దర్యాప్తు అధికారులను విస్మయానికి గురిచేస్తోంది.
సాధారణంగా విమానం సాంకేతిక లోపానికి గురైనా లేదా నియంత్రణ కోల్పోతున్నా పైలట్లు వెంటనే ఎయిర్ ట్రాఫిక్ కంట్రోల్ (ATC)కి సమాచారం అందిస్తారు. కానీ అజిత్ పవార్ ప్రయాణిస్తున్న బాంబార్డియర్ లియర్ జెట్ విషయంలో అలాంటి సంకేతాలేవీ అందలేదు. రెండోసారి ల్యాండింగ్కు ప్రయత్నిస్తున్న సమయంలోనే విమానం కుప్పకూలినట్లు తెలుస్తోంది. ప్రతికూల వాతావరణం లేదా పొగమంచు కారణంగా రన్వే సరిగ్గా కనిపించకపోవడం వల్ల ఈ ‘విజువల్ డిసోరియంటేషన్’ జరిగి ఉండవచ్చని నిపుణులు భావిస్తున్నారు.
ఈ ప్రమాదంలో అజిత్ పవార్తో పాటు మరో నలుగురు మరణించిన సంగతి తెలిసిందే. డీజీసీఏ తన నివేదికలో పైలట్లు అనుసరించిన ‘గో అరౌండ్’ ప్రక్రియపై పూర్తిస్థాయి విశ్లేషణ చేస్తోంది. రన్వేపై విమానం దిగడానికి ముందు ఎదురైన అడ్డంకులు ఏమిటి? పైలట్లకు ప్రమాద హెచ్చరికలు అందలేదా? అనే కోణంలో బ్లాక్ బాక్స్ డేటాను విశ్లేషించనున్నారు. దేశవ్యాప్తంగా విషాదం నింపిన ఈ ఘటన వెనుక అసలు కారణాలను వెలికితీసేందుకు ప్రత్యేక బృందాలు రంగంలోకి దిగాయి.
