హైదరాబాద్లోని ఖైరతాబాద్ నియోజకవర్గ పరిధిలో వీధి కుక్కలు మరోసారి రక్తాన్ని చిందించాయి. శ్రీనివాస్ నగర్కు చెందిన పాక శార్వి అనే నాలుగేళ్ల చిన్నారి సోమవారం సాయంత్రం తన ఇంటి ముందు ఆడుకుంటుండగా, ఒక వీధి కుక్క ఆకస్మికంగా దాడి చేసింది. ఆ కుక్క చిన్నారి ముఖంపై విచక్షణారహితంగా కొరకడంతో పాపకు తీవ్ర గాయాలయ్యాయి. అదే సమయంలో అటుగా వెళ్తున్న ఒక బైక్ వాహనదారుడు సకాలంలో స్పందించి కుక్కను వెళ్లగొట్టడంతో పెను ప్రమాదం తప్పింది, లేదంటే చిన్నారి ప్రాణాలకే ముప్పు వాటిల్లి ఉండేదని స్థానికులు చెబుతున్నారు.
కుక్క దాడిలో రక్తసిక్తమైన చిన్నారిని కుటుంబ సభ్యులు వెంటనే బంజారాహిల్స్లోని రెయిన్బో ఆసుపత్రికి తరలించారు. ప్రస్తుతం వైద్యులు పాపకు అత్యవసర చికిత్స అందిస్తున్నారు. చిన్నారి ముఖంపై గాయాలు లోతుగా ఉండటంతో ప్లాస్టిక్ సర్జరీ అవసరమయ్యే అవకాశం ఉందని తెలుస్తోంది. తమ కళ్లముందే ఆడుకుంటున్న బిడ్డ ఇలా ఆసుపత్రి పాలు కావడంతో తల్లిదండ్రులు కన్నీరుమున్నీరవుతున్నారు. అధికారుల నిర్లక్ష్యం వల్లే తమ బిడ్డకు ఈ పరిస్థితి వచ్చిందని వారు ఆవేదన వ్యక్తం చేస్తున్నారు.
ఈ ఘటనతో శ్రీనివాస్ నగర్ కాలనీవాసులు భయాందోళనకు గురవుతున్నారు. నగరంలో వీధి కుక్కల సంఖ్య విపరీతంగా పెరిగిపోయిందని, పిల్లలను బయటకు పంపాలన్నా భయం వేస్తోందని వారు వాపోతున్నారు. జీహెచ్ఎంసీ (GHMC) అధికారులకు ఎన్నిసార్లు ఫిర్యాదు చేసినా పరిస్థితిలో మార్పు రావడం లేదని, కుక్కలను పట్టుకెళ్లి మళ్ళీ అక్కడే వదిలేయడం వల్ల సమస్య పరిష్కారం కావడం లేదని ఆగ్రహం వ్యక్తం చేస్తున్నారు. ప్రభుత్వం వెంటనే స్పందించి వీధి కుక్కల బెడద నుంచి శాశ్వత విముక్తి కల్పించాలని డిమాండ్ చేస్తున్నారు.
