తెలంగాణ రాష్ట్రంలో ముఖ్యమంత్రి రేవంత్ రెడ్డి నేతృత్వంలోని ప్రజా ప్రభుత్వం గణనీయమైన విజయాలను సాధించిందని గవర్నర్ జిష్ణుదేవ్ వర్మ కొనియాడారు. సికింద్రాబాద్ పరేడ్ గ్రౌండ్స్లో నిర్వహించిన 77వ గణతంత్ర దినోత్సవ వేడుకల్లో ఆయన జాతీయ పతాకాన్ని ఆవిష్కరించారు. ఈ సందర్భంగా ఆయన మాట్లాడుతూ, నిరుద్యోగ యువతకు భరోసా ఇస్తూ పబ్లిక్ సర్వీస్ కమిషన్ మరియు పోలీస్ రిక్రూట్మెంట్ బోర్డు ద్వారా ఇప్పటివరకు 62,749 మందికి ఉద్యోగాలు కల్పించినట్లు ప్రకటించారు. గ్రూప్-I నుండి IV వరకు నియామక ప్రక్రియను విజయవంతంగా పూర్తి చేయడం ప్రభుత్వ చిత్తశుద్ధికి నిదర్శనమని ఆయన పేర్కొన్నారు.
రాష్ట్ర సంక్షేమ పథకాల గురించి వివరిస్తూ.. పేదల సొంతింటి కల సాకారం చేసేందుకు ప్రతి నియోజకవర్గానికి 3,500 ఇళ్ల చొప్పున తొలి దశలో 4.5 లక్షల ఇళ్లను మంజూరు చేసినట్లు గవర్నర్ తెలిపారు. దేశంలోనే తొలిసారిగా కోటి కుటుంబాలకు ఉచితంగా సన్నబియ్యం పంపిణీ చేస్తున్న ఏకైక రాష్ట్రం తెలంగాణ అని ఆయన గర్వంగా ప్రకటించారు. రైతు సంక్షేమానికి పెద్దపీట వేస్తూ రూ.20,617 కోట్ల వ్యయంతో 26 లక్షల మంది రైతుల రుణాలను మాఫీ చేశామని, వ్యవసాయానికి 24 గంటల నాణ్యమైన విద్యుత్తును అందిస్తున్నామని వివరించారు.
భవిష్యత్తు దార్శనికతపై మాట్లాడుతూ.. ‘తెలంగాణ రైజింగ్ విజన్-2047’ ద్వారా 2047 నాటికి రాష్ట్రాన్ని 3 ట్రిలియన్ డాలర్ల ఆర్థిక వ్యవస్థగా తీర్చిదిద్దడమే లక్ష్యమని గవర్నర్ స్పష్టం చేశారు. ముచ్చర్ల ప్రాంతంలో 30,000 ఎకరాల్లో నిర్మిస్తున్న ‘భారత్ ఫ్యూచర్ సిటీ’, మూసీ నది పునరుజ్జీవనం మరియు చెరువుల ఆక్రమణల నివారణకు తీసుకొచ్చిన ‘హైడ్రా’ వంటి వినూత్న కార్యక్రమాలను ఆయన ప్రశంసించారు. ఉస్మానియా ఆసుపత్రి నూతన భవన నిర్మాణం మరియు రహదారుల అభివృద్ధి కోసం కేటాయించిన భారీ నిధులను ప్రస్తావిస్తూ, తెలంగాణ సమగ్ర అభివృద్ధి దిశగా దూసుకుపోతోందని ఆయన ఆకాంక్షించారు.
