ప్రపంచ ఆర్థిక వేదిక (WEF) సదస్సులో పాల్గొనేందుకు ముఖ్యమంత్రి చంద్రబాబు నాయుడుతో కలిసి స్విట్జర్లాండ్ వెళ్లిన మంత్రి నారా లోకేశ్, జ్యూరిచ్లో జరిగిన సమావేశాల్లో ప్రత్యేక ఆకర్షణగా నిలిచారు. సాధారణంగా ఫార్మల్ దుస్తుల్లో కనిపించే లోకేశ్, ఈ పర్యటన ఆరంభంలో చాలా సింపుల్గా క్యాజువల్ లుక్లో దర్శనమిచ్చారు. గోధుమ రంగు ఫుల్ హ్యాండ్ టీషర్టు, ప్యాంట్ ధరించి ఆయన వివిధ కంపెనీల ప్రతినిధులతో భేటీ అయ్యారు. దీనికి సంబంధించిన ఫోటోలు ప్రస్తుతం సోషల్ మీడియాలో వైరల్ అవుతున్నాయి.
పెట్టుబడుల వేటలో భాగంగా జ్యూరిచ్లో భారత రాయబారి మృదుల్ కుమార్తో ఏపీ బృందం సమావేశమైంది. ఈ సందర్భంగా ఫార్మా, మెడికల్ డివైజెస్, టెక్నాలజీ రంగాల్లో స్విస్ కంపెనీలను ఆంధ్రప్రదేశ్కు తీసుకురావడంపై లోకేశ్ కీలక చర్చలు జరిపారు. అనంతరం ఈరోస్ ఇన్నోవేషన్స్ ప్రతినిధులతో భేటీ అయి, రాష్ట్రంలో ఆర్టిఫిషియల్ ఇంటెలిజెన్స్ (AI) ఆధారిత క్రియేటివ్ పరిశ్రమలు మరియు ఏఐ ఫిల్మ్ సిటీ ఏర్పాటు ప్రతిపాదనలను వివరించారు. రాష్ట్రంలో యువతకు ఉద్యోగ అవకాశాలు కల్పించేలా అత్యాధునిక సాంకేతిక రంగాలను ఏపీకి రప్పించడమే తన ప్రధాన లక్ష్యమని ఆయన పేర్కొన్నారు.
జనవరి 23 వరకు కొనసాగనున్న ఈ పర్యటనలో మంత్రి లోకేశ్ ఐబీఎం, గూగుల్ క్లౌడ్ వంటి అంతర్జాతీయ దిగ్గజ సంస్థల సీఈఓలతో సమావేశం కానున్నారు. ‘బ్రాండ్ ఆంధ్ర’ను ప్రపంచ వేదికపై చాటిచెబుతూ గ్రీన్ ఎనర్జీ, ఎలక్ట్రానిక్స్ మరియు తయారీ రంగాల్లో ఎంఓయూలు (MoUs) కుదుర్చుకోవడమే ఈ పర్యటన ప్రధాన ఉద్దేశం. ఇప్పటికే బ్యూలర్ గ్రూప్తో భేటీ అయిన లోకేశ్, ఏపీలో ఫుడ్ ప్రాసెసింగ్ హబ్ను ఏర్పాటు చేయాలని ఆ సంస్థకు ప్రతిపాదనలు కూడా పంపారు.
