అగ్రరాజ్యం అమెరికా మరియు ఇరాన్ మధ్య ముదురుతున్న ఉద్రిక్తతల నేపథ్యంలో టెహ్రాన్ ప్రభుత్వం హఠాత్తుగా తన గగనతలాన్ని (Airspace) మూసివేసింది. అయితే, ఈ మూసివేత ప్రక్రియ అమలులోకి రావడానికి కేవలం కొన్ని నిమిషాల ముందు, మన దేశానికి చెందిన ఇండిగో విమానం (6E-1808) ఆ గగనతలాన్ని దాటి సురక్షితంగా బయటకు వచ్చేసింది. జార్జియా రాజధాని టిబిలిసి నుంచి ఢిల్లీకి వస్తున్న ఈ విమానం, ఇరాన్ సరిహద్దులు మూసివేసే సమయానికి అక్కడ ఉన్న చివరి అంతర్జాతీయ విమానంగా నిలిచింది.
ఫ్లైట్ రాడార్ డేటా ప్రకారం, ఇరాన్ తన గగనతలాన్ని మూసివేస్తున్నట్లు నోటీసు (NOTAM) జారీ చేసే సమయానికి చాలా దేశాల విమానాలు తమ మార్గాలను మళ్లించుకున్నాయి. కానీ ఇండిగో 6E-1808 విమానం అప్పటికే ఇరాన్ భూభాగంపై ఉంది. ఆ సమయంలో ఇరాన్ గగనతలంలో ఉన్న ఏకైక ‘నాన్-ఇరానియన్’ విమానం ఇదే కావడం గమనార్హం. ఈ విమానం సకాలంలో ఇరాన్ సరిహద్దు దాటి పాకిస్థాన్ గగనతలంలోకి ప్రవేశించడంతో పెను ప్రమాదం తప్పినట్లయింది.
ప్రస్తుతం ఇరాన్ గగనతలం మూసివేతతో భారత్ నుంచి యూరప్ మరియు అమెరికా వెళ్లే విమానాలపై తీవ్ర ప్రభావం పడుతోంది. ఎయిర్ ఇండియా, ఇండిగో వంటి సంస్థలు తమ విమానాలను అరేబియా సముద్రం లేదా మధ్య ఆసియా మీదుగా సుదీర్ఘ మార్గాల్లో మళ్లించాల్సి వస్తోంది. దీనివల్ల ప్రయాణ సమయం పెరగడమే కాకుండా, ఇంధన ఖర్చు కూడా పెరిగే అవకాశం ఉంది. పరిస్థితిని నిరంతరం పర్యవేక్షిస్తున్నట్లు భారత విమానయాన శాఖ (DGCA) వెల్లడించింది.
