తమిళనాడు రాష్ట్రం సేలం జాతీయ రహదారిపై ఉత్తమసోలాపురం సమీపంలోని అరియనూర్ వద్ద పెను విషాదం చోటుచేసుకుంది. తమిళనాడు రాష్ట్ర రోడ్డు రవాణా సంస్థకు చెందిన బస్సు కోయంబత్తూరు నుండి సేలంకు వెళ్తుండగా ఒక్కసారిగా అదుపుతప్పింది. డివైడర్ దాటుకుని అవతలి లైన్లోకి దూసుకువచ్చిన ఈ బస్సు ఎదురుగా వస్తున్న గూడ్స్ ఆటోను, ఒక ద్విచక్ర వాహనాన్ని బలంగా ఢీకొట్టింది. ఈ భీకర ప్రమాదంలో ఎనిమిది మంది అక్కడికక్కడే ప్రాణాలు కోల్పోయారు.
మృతుల్లో ఒకే కుటుంబానికి చెందిన ఆరుగురు ఉండటం అత్యంత విషాదకరం. వీరంతా ఒక శుభకార్యానికి వెళ్లి గూడ్స్ ఆటోలో తిరిగి వస్తుండగా ఈ ప్రమాదం జరిగింది. అలాగే ద్విచక్ర వాహనంపై వెళ్తున్న తల్లి, ఆమె చిన్నారి కూతురు కూడా ఈ ప్రమాదంలో మరణించారు. మృతులను సెల్వరాజ్, మురుగన్, అముధ, మణికందన్, ఇరుసాయి, సత్య, ఐదేళ్ల నితీష మరియు 11 నెలల పసికందు జీవికగా పోలీసులు గుర్తించారు. ఆటోలో ఉన్న మరో ఇద్దరి పరిస్థితి ప్రస్తుతం విషమంగా ఉంది.
ప్రమాదం జరిగిన సమయంలో బస్సులో మొత్తం 40 మంది ప్రయాణికులు ఉన్నారు. అతివేగం కారణంగానే డ్రైవర్ బస్సుపై నియంత్రణ కోల్పోయినట్లు ప్రాథమిక విచారణలో తేలింది. ఈ ఘటనకు సంబంధించిన దృశ్యాలు సమీపంలోని సీసీటీవీ కెమెరాల్లో రికార్డ్ అయ్యాయి. పోలీసులు కేసు నమోదు చేసి గాయపడిన వారిని చికిత్స నిమిత్తం ఆసుపత్రికి తరలించారు. ఈ ప్రమాద ఘటన స్థానికంగా తీవ్ర కలకలం రేపింది.
