నకిరేకల్: నకిరేకల్ పట్టణంలోని AVM స్కూల్ హాస్టల్లో కలుషిత ఆహారం తినడంతో 27 మంది విద్యార్థులు ఫుడ్ పాయిజన్కు గురయ్యారు. అస్వస్థతకు గురైన విద్యార్థులను చికిత్స కోసం ఆసుపత్రికి తరలించారు. ఈ ఘటనతో విద్యార్థుల తల్లిదండ్రుల్లో ఆందోళన నెలకొంది.
హాస్టల్ సిబ్బంది నిర్లక్ష్యం, యాజమాన్యం అలసత్వం కారణంగానే ఈ ఘటన చోటుచేసుకుందని తల్లిదండ్రులు ఆరోపించారు. గతంలో కూడా ఇదే విధంగా కలుషిత ఆహారం కారణంగా విద్యార్థులు అస్వస్థతకు గురైనప్పటికీ, అప్పట్లో ఎలాంటి చర్యలు తీసుకోలేదని వారు ఆవేదన వ్యక్తం చేశారు. హాస్టల్లో విద్యార్థులకు అందించే ఆహారం నాణ్యతపై అధికారులు వెంటనే దృష్టి సారించాలని డిమాండ్ చేశారు.
మరోవైపు, విద్యార్థుల వైద్య ఖర్చులతో తమకు సంబంధం లేదని AVM యాజమాన్యం పేర్కొన్నట్లు తల్లిదండ్రులు ఆరోపించారు. దీంతో వారి ఆగ్రహం మరింత పెరిగింది. విద్యార్థుల ఆరోగ్యానికి సంబంధించిన విషయంలో నిర్లక్ష్యంగా వ్యవహరించిన వారిపై చర్యలు తీసుకోవాలని, ఘటనపై సమగ్ర విచారణ జరిపించాలని తల్లిదండ్రులు కోరుతున్నారు.
