హైదరాబాద్లోని బంజారాహిల్స్లో ఒక ఘరానా మోసం వెలుగుచూసింది. ఆంధ్రప్రదేశ్కు చెందిన ఒక ప్రముఖ వ్యక్తికి వ్యక్తిగత సహాయకుడిని (PA) అని నమ్మబలికి, ఓ జ్యువెలరీ షాపు యజమానురాలిని బురిడీ కొట్టించి రూ.1.61 కోట్ల విలువైన కిలో బంగారు ఆభరణాలను ఒక వ్యక్తి కాజేశాడు. నిందితుడు శ్రీనాథ్ రాఠీ అలియాస్ అంకిత్, ఇన్స్టాగ్రామ్ ద్వారా బంజారాహిల్స్ రోడ్ నంబర్ 2లో నగల దుకాణం నడిపే లక్ష్మీ కావ్యతో పరిచయం పెంచుకుని ఈ భారీ దోపిడీకి పాల్పడ్డాడు.
ఈ మోసం చాలా పథకం ప్రకారం జరిగింది. నిందితుడు బాధితురాలి నమ్మకాన్ని చూరగొనడానికి మొదట మూడుసార్లు కొద్ది మొత్తంలో అసలైన బంగారు బిస్కెట్లను ఇచ్చి, వాటికి సమానమైన నగలను తీసుకున్నాడు. అయితే నాలుగోసారి తన అసలు స్వరూపాన్ని బయటపెట్టాడు. ఫిబ్రవరి 25న రూ.1.61 కోట్ల విలువైన నగలను తీసుకుని, వాటికి బదులుగా తన అసిస్టెంట్ ద్వారా కిలో బరువున్న నకిలీ బంగారు బిస్కెట్లను పంపాడు. ఆ బిస్కెట్ల సంఖ్యపై అనుమానం వచ్చిన బాధితురాలు వాటిని పరీక్షించగా అవి నకిలీవని తేలింది. వెంటనే నిందితుడికి ఫోన్ చేయగా అది స్విచ్ఛాఫ్ రావడంతో తాను మోసపోయానని గ్రహించి పోలీసులను ఆశ్రయించింది.
బంజారాహిల్స్ పోలీసులు కేసు నమోదు చేసి దర్యాప్తు చేయగా నిందితుడు శ్రీనాథ్ రాఠీ పాత నేరస్థుడని తేలింది. ఐదేళ్ల క్రితం యూట్యూబ్ ఛానెల్ ప్రారంభించి, తాను కామర్స్ లెక్చరర్ని అని చెప్పుకుంటూ సీఏ విద్యార్థులను నమ్మించి సుమారు రూ.2.48 కోట్లు వసూలు చేసి పరారైనట్లు విచారణలో వెల్లడైంది. నిందితుడు అమాయక నిరుద్యోగులను తన అసిస్టెంట్లుగా చేర్చుకుని ఇలాంటి మోసాలకు వాడుకుంటున్నట్లు పోలీసులు గుర్తించారు. ప్రస్తుతం నిందితుడి కోసం గాలింపు చర్యలు ముమ్మరం చేశారు.
