తెలంగాణలో కొత్తగా కొలువుదీరిన గ్రామ పంచాయతీ పాలకవర్గాలకు రేవంత్ రెడ్డి ప్రభుత్వం తీపి కబురు అందించింది. గ్రామాల్లో మౌలిక వసతుల కల్పన మరియు రోజువారీ నిర్వహణ ఖర్చుల కోసం రూ. 250 కోట్లను విడుదల చేస్తూ ఆర్థిక శాఖ బుధవారం (ఫిబ్రవరి 18, 2026) ఉత్తర్వులు జారీ చేసింది. సర్పంచ్ ఎన్నికలు పూర్తయిన తర్వాత రాష్ట్ర ప్రభుత్వం నేరుగా పంచాయతీలకు నిధులు కేటాయించడం ఇదే మొదటిసారి కావడంతో, పెండింగ్లో ఉన్న చిన్నపాటి అభివృద్ధి పనులు ఇకపై వేగవంతం కానున్నాయి.
ఈ నిధులను ప్రధానంగా గ్రామాల్లోని పారిశుద్ధ్య నిర్వహణ, తాగునీటి ఎద్దడి నివారణ, స్ట్రీట్ లైట్ల ఏర్పాటు మరియు మురుగునీటి కాల్వల మరమ్మతుల కోసం వినియోగించనున్నారు. పంచాయతీలపై భారంగా మారిన కరెంటు బిల్లుల చెల్లింపులు, పారిశుద్ధ్య కార్మికుల వేతనాల సర్దుబాటుకు కూడా ఈ నిధులు కొంత ఊరటనివ్వనున్నాయి. నిధుల వినియోగంలో సర్పంచ్లు, పంచాయతీ కార్యదర్శులు పూర్తి పారదర్శకత పాటించాలని, నిధులు దుర్వినియోగం కాకుండా చూడాలని ప్రభుత్వం స్పష్టమైన ఆదేశాలు జారీ చేసింది.
మరోవైపు, 15వ ఆర్థిక సంఘం నిధుల కింద కేంద్ర ప్రభుత్వం కూడా ఇప్పటికే రెండు విడతలుగా సుమారు రూ. 647 కోట్లను విడుదల చేసింది. కేంద్రం నుంచి రావాల్సిన మొత్తం రూ. 3 వేల కోట్లలో ఇంకా అధిక భాగం పెండింగ్లో ఉన్నప్పటికీ, ఇప్పుడు రాష్ట్ర ప్రభుత్వం విడుదల చేసిన రూ. 250 కోట్లు గ్రామ పంచాయతీలకు తక్షణ ఆర్థిక వెసులుబాటును కల్పించనున్నాయి. అటు కేంద్రం, ఇటు రాష్ట్ర నిధులు ఒకేసారి అందుబాటులోకి రావడంతో రాష్ట్రంలోని గ్రామ పంచాయతీల రూపురేఖలు మారతాయని అధికార వర్గాలు ఆశాభావం వ్యక్తం చేస్తున్నాయి.
