జగిత్యాల మున్సిపల్ చైర్పర్సన్ ఎన్నిక నేపథ్యంలో కాంగ్రెస్ సీనియర్ నాయకుడు, ఎమ్మెల్సీ జీవన్ రెడ్డి మరోసారి తీవ్ర అసంతృప్తి వ్యక్తం చేశారు. గత పదేళ్లుగా పార్టీ జెండా మోసిన అసలైన కార్యకర్తలను పక్కన పెట్టి, ఇటీవల పార్టీలో చేరిన (బిఆర్ఎస్ ఎమ్మెల్యే) సంజయ్ కుమార్ సూచించిన వారికి ప్రాధాన్యత ఇవ్వడంపై ఆయన మండిపడ్డారు. “ఇంకెన్నాళ్లు ఈ అవమానాలు భరించాలి?” అంటూ హైకమాండ్ను ఉద్దేశించి ఆయన చేసిన వ్యాఖ్యలు ఇప్పుడు తెలంగాణ రాజకీయాల్లో హాట్ టాపిక్గా మారాయి. సంజయ్ కుమార్ వల్ల పార్టీ శ్రేణుల్లో అయోమయం నెలకొందని, ఇది తనను వ్యక్తిగతంగా అవమానించడమేనని ఆయన ఆవేదన వ్యక్తం చేశారు.
ఈ వివాదం పరిష్కారానికి కాంగ్రెస్ అధిష్టానం ఒక ‘రాజీ ఫార్ములా’ను రూపొందించింది. దీని ప్రకారం, చైర్పర్సన్ పదవిని సంజయ్ కుమార్ వర్గానికి చెందిన సమిళ్ల వాణికి, వైస్ చైర్మన్ పదవిని జీవన్ రెడ్డి వర్గానికి చెందిన జీనత్ పర్వీన్కు కేటాయించాలని నిర్ణయించారు. అయితే, తన వర్గానికి చైర్మన్ పదవి దక్కకపోవడంపై జీవన్ రెడ్డి వర్గం తీవ్ర ఆగ్రహంతో ఉంది. “పార్టీని నమ్ముకున్న వారికి అన్యాయం చేసి, ఇతర పార్టీల నుండి వచ్చిన వారికి పెద్దపీట వేయడం ఏంటని” వారు ప్రశ్నిస్తున్నారు. ఈ క్రమంలోనే జీవన్ రెడ్డి అనుచరులు కొందరు ‘ప్రజా భవన్’ వద్దకు చేరుకుని తమ నిరసనను వ్యక్తం చేశారు.
జగిత్యాల మున్సిపాలిటీలో మొత్తం 50 స్థానాలకు గాను కాంగ్రెస్ 23 స్థానాలను గెలుచుకుంది. ఇందులో సంజయ్ వర్గం నుంచి 14 మంది, జీవన్ రెడ్డి వర్గం నుంచి 9 మంది గెలిచారు. స్వతంత్రుల మద్దతుతో మేజిక్ ఫిగర్ను దాటినప్పటికీ, ఈ ఇద్దరు నేతల మధ్య ఉన్న ‘ఈగో వార్’ అధిష్టానానికి పెద్ద తలనొప్పిగా మారింది. జీవన్ రెడ్డికి రాజ్యసభ సీటు లేదా సముచిత గౌరవం ఇవ్వాలని ఆయన అనుచరులు డిమాండ్ చేస్తుండగా, మున్సిపల్ పీఠం దక్కించుకున్న సంజయ్ వర్గం తమ పట్టును నిరూపించుకుంది. ఈ పరిణామాల నేపథ్యంలో జీవన్ రెడ్డి తదుపరి అడుగు ఎలా ఉంటుందనేది ఇప్పుడు ఉత్కంఠ రేపుతోంది.
