మైక్రోసాఫ్ట్ వ్యవస్థాపకుడు బిల్ గేట్స్ తన అమరావతి పర్యటనలో భాగంగా సోమవారం ఉండవల్లిలోని ఒక వ్యవసాయ క్షేత్రాన్ని సందర్శించారు. ముఖ్యమంత్రి చంద్రబాబు నాయుడుతో కలిసి పొలంలోకి వెళ్లిన ఆయన, అక్కడ రైతులు ఉపయోగిస్తున్న అత్యాధునిక సాంకేతికతను చూసి ఆశ్చర్యం వ్యక్తం చేశారు. ముఖ్యంగా ఆర్టిఫిషియల్ ఇంటెలిజెన్స్ (AI) సాయంతో మొక్కలకు సోకిన తెగుళ్లను గుర్తించడం, డ్రోన్ల ద్వారా మందులు పిచికారీ చేసే విధానాన్ని ఆయన ప్రత్యక్షంగా చూసి “అభివృద్ధి చెందిన దేశాల కంటే ఏపీ రైతులు టెక్నాలజీలో ముందున్నారు” అని కొనియాడారు.
ఈ పర్యటనలో సాంకేతికతతో పాటు స్థానిక రుచులు కూడా బిల్ గేట్స్ను ఆకట్టుకున్నాయి. ఉండవల్లి పొలంలో రైతులు ఆయనకు మన లోకల్ ఫ్లేవర్ అయిన వేడివేడి పుణుగులు, బొండాలను అల్పాహారంగా అందించారు. వీటిని రుచి చూసిన బిల్ గేట్స్, ఆంధ్రా స్నాక్స్ చాలా బాగున్నాయంటూ ప్రశంసించారు. గతంలో టీ, వడలను ఇష్టంగా తిన్న ఆయన, ఇప్పుడు ఉండవల్లి పుణుగుల రుచికి ఫిదా అవ్వడం విశేషం.
అంతకుముందు సచివాలయంలో జరిగిన భేటీలో ‘స్వర్ణాంధ్ర విజన్ 2047’పై చర్చించారు. ప్రజారోగ్యం కోసం చేపట్టిన ‘సంజీవని’ ప్రాజెక్టు, భూ రికార్డుల కోసం వాడుతున్న బ్లాక్ చెయిన్ టెక్నాలజీని పరిశీలించిన గేట్స్, ఏపీ ప్రభుత్వ పనితీరును అభినందించారు. గేట్స్ ఫౌండేషన్ సహకారంతో విద్య, వైద్యం, వ్యవసాయ రంగాల్లో మరిన్ని వినూత్న మార్పులు తీసుకొచ్చేందుకు ఈ పర్యటనలో కీలక నిర్ణయాలు తీసుకున్నారు. పర్యటన ముగించుకున్న ఆయన సాయంత్రం ముంబైకి బయలుదేరి వెళ్లారు.
