భారత రక్షణ మంత్రి రాజ్నాథ్ సింగ్ నేతృత్వంలోని డిఫెన్స్ అక్విజిషన్ కౌన్సిల్ (DAC) గురువారం ఈ భారీ ఒప్పందానికి ఆమోదం ముద్ర వేసింది. ఫిబ్రవరి 18న ఫ్రాన్స్ అధ్యక్షుడు ఇమ్మాన్యుయేల్ మేక్రాన్ భారత్లో పర్యటించనున్న తరుణంలో ఈ ప్రకటన రావడం అంతర్జాతీయంగా ప్రాధాన్యత సంతరించుకుంది. ఇది భారత వైమానిక దళం (IAF) యొక్క మల్టీ రోల్ ఫైటర్ ఎయిర్క్రాఫ్ట్ (MRFA) అవసరాలను తీర్చడంలో మైలురాయిగా నిలవనుంది.
-
మొత్తం విమానాలు: భారత సైన్యం కోసం మొత్తం 114 రఫెల్ జెట్లను కొనుగోలు చేయనున్నారు. ఇందులో 88 సింగిల్ సీటర్ విమానాలు కాగా, 26 ట్విన్ సీటర్ (శిక్షణకు ఉపయోగపడే) వేరియంట్లు ఉన్నాయి.
-
మేక్ ఇన్ ఇండియాకు ప్రాధాన్యత: ఈ 114 విమానాలలో 18 జెట్లను నేరుగా ఫ్రాన్స్ నుంచి సిద్ధంగా ఉన్న స్థితిలో (Fly-away condition) దిగుమతి చేసుకుంటారు. మిగిలిన 96 విమానాలను మేక్ ఇన్ ఇండియా కార్యక్రమంలో భాగంగా ఫ్రాన్స్కు చెందిన డసాల్ట్ ఏవియేషన్ భారతీయ ప్రైవేట్ భాగస్వాములతో కలిసి దేశీయంగానే తయారు చేయనుంది.
-
సాంకేతికత బదిలీ: ఈ ఒప్పందంలో భాగంగా అత్యంత అధునాతన యుద్ధ విమాన సాంకేతికత (Technology Transfer) భారత్కు అందనుంది. దీనివల్ల భవిష్యత్తులో యుద్ధ విమానాల తయారీలో భారత్ స్వయంసమృద్ధి సాధించడానికి అవకాశం ఉంటుంది.
ఆపరేషన్ సిందూర్ ప్రభావం:
గతంలో జరిగిన ఆపరేషన్ సిందూర్ సమయంలో పాకిస్థాన్పై ఆధిపత్యం ప్రదర్శించడంలో రఫేల్ విమానాలు పోషించిన పాత్ర అద్వితీయం. ఆ అనుభవంతోనే మరిన్ని విమానాలను అత్యవసరంగా సమకూర్చుకోవాలని రక్షణ శాఖ నిర్ణయించింది. ఈ ఒప్పందం ద్వారా భారత వైమానిక దళానికి సరిహద్దుల్లో ఎదురులేని శక్తి లభించనుంది.
తదుపరి అడుగు: రక్షణ మంత్రిత్వ శాఖ ఆమోదం పొందిన ఈ ప్రతిపాదన ఇప్పుడు భద్రతా వ్యవహారాల క్యాబినెట్ కమిటీ (CCS) ముందుకు వెళ్లనుంది. ప్రధానమంత్రి నరేంద్ర మోదీ నేతృత్వంలోని ఈ కమిటీ తుది ఆమోదం తెలిపిన తర్వాత ఇరు దేశాల మధ్య అధికారిక ఒప్పందం జరుగుతుంది.
