ఫోన్ ట్యాపింగ్ కేసు విచారణకు సంబంధించి తన ఇంటి గోడపై నోటీసు అతికించడంపై బీఆర్ఎస్ అధినేత, మాజీ ముఖ్యమంత్రి కేసీఆర్ తీవ్ర అసంతృప్తి వ్యక్తం చేశారు. ఈ మేరకు ఆయన జూబ్లీహిల్స్ ఏసీపీకి ఒక లేఖ రాశారు. ఒక బాధ్యతాయుతమైన పౌరుడిగా, ప్రతిపక్ష నేతగా ఉన్న తన ఇంటికి నోటీసు అంటించడం ద్వారా తన గౌరవానికి భంగం కలిగించారని ఆయన ఆవేదన వ్యక్తం చేశారు. చట్ట ప్రకారం తనకు నోటీసులు నేరుగా ఇవ్వలేదని, ఈ చర్య రాజ్యాంగ విరుద్ధమని ఆయన లేఖలో పేర్కొన్నారు.
65 ఏళ్లు దాటిన వ్యక్తులను వారి నివాసం వద్దనే విచారించాలని చట్టం చెబుతోందని కేసీఆర్ గుర్తు చేశారు. తన ప్రస్తుత నివాసం ఎర్రవల్లిలో ఉందని, భవిష్యత్తులో నోటీసులన్నీ అక్కడికే పంపాలని స్పష్టం చేశారు. జూబ్లీహిల్స్ ఏసీపీకి తనను విచారించే అధికార పరిధి లేదని, పోలీసుల తీరు సుప్రీంకోర్టు మార్గదర్శకాలను ఉల్లంఘించడమేనని ఆరోపించారు. నోటీసుల జారీలో పోలీసులు అనుసరిస్తున్న విధానం కోర్టు ధిక్కరణ కిందకు వస్తుందని ఆయన విమర్శించారు.
అక్రమ పద్ధతిలో ఇచ్చిన ఈ నోటీసులను తాను విస్మరించవచ్చని, అయినప్పటికీ విచారణకు సహకరిస్తానని కేసీఆర్ ప్రకటించారు. ఫిబ్రవరి 1వ తేదీ (రేపు) మధ్యాహ్నం 3 గంటలకు నందినగర్లోని తన నివాసంలోనే విచారణకు అందుబాటులో ఉంటానని స్పష్టం చేశారు. ఈ సందర్భంగా ఏపీ హైకోర్టు గతంలో ఇచ్చిన ‘వీడీ మూర్తి’ కేసు తీర్పును కూడా ఆయన లేఖలో ప్రస్తావించారు. కేసీఆర్ విచారణ నేపథ్యంలో బీఆర్ఎస్ శ్రేణులు రాష్ట్రవ్యాప్త నిరసనలకు పిలుపునివ్వడంతో రాజకీయ వాతావరణం వేడెక్కింది.
