ఆసియాలోనే అతిపెద్ద గిరిజన జాతర మేడారం సమ్మక్క-సారలమ్మ మహాజాతర ప్రారంభం వేళ తీవ్ర విషాదం చోటుచేసుకుంది. బుధవారం జాతర మొదటి రోజున పుణ్యస్నానాలు ఆచరించేందుకు జంపన్న వాగులోకి దిగిన ఒక భక్తుడు ప్రమాదవశాత్తు నీటిలో మునిగి ప్రాణాలు కోల్పోయాడు. మృతుడిని మంచిర్యాల జిల్లాకు చెందిన వ్యక్తిగా పోలీసులు ప్రాథమికంగా గుర్తించారు. గజ ఈతగాళ్ల సాయంతో మృతదేహాన్ని వెలికితీసి, కేసు నమోదు చేసి దర్యాప్తు చేస్తున్నారు. వనదేవతల దర్శనం కోసం తరలివచ్చిన భక్తులు ఈ ఘటనతో దిగ్భ్రాంతికి గురయ్యారు.
మరోవైపు, జాతరకు వస్తున్న భక్తులను రోడ్డు ప్రమాదాలు వెంటాడుతున్నాయి. ఆసిఫాబాద్ జిల్లా నుంచి ట్రాక్టర్లో మేడారం వస్తున్న క్రమంలో పెగడపల్లి పెద్దవాగు వద్ద ట్రాక్టర్ అదుపు తప్పి బోల్తా పడింది. ఈ ప్రమాదంలో కస్తూరి లక్ష్మి (45), ఆమె కుమార్తె అక్షిత (21) అక్కడికక్కడే మృతి చెందారు. వీరితో పాటు ప్రయాణిస్తున్న మరో 18 మందికి తీవ్ర గాయాలయ్యాయి. సమాచారం అందుకున్న మంత్రి శ్రీధర్ బాబు వెంటనే భూపాలపల్లి ఆసుపత్రికి చేరుకుని బాధితులను పరామర్శించారు. మెరుగైన వైద్యం కోసం క్షతగాత్రులను వరంగల్లోని ఎంజీఎం ఆసుపత్రికి తరలించాలని అధికారులను ఆదేశించారు.
జాతర ప్రారంభమైన తొలిరోజే ఇటు నీటి ప్రమాదం, అటు రోడ్డు ప్రమాదాలు సంభవించడంతో పోలీసులు భక్తులను అప్రమత్తం చేస్తున్నారు. ముఖ్యంగా జంపన్న వాగులో స్నానాలు చేసే సమయంలో జాగ్రత్తగా ఉండాలని, సుదూర ప్రాంతాల నుంచి వాహనాల్లో వచ్చేవారు నిద్రమత్తులో డ్రైవింగ్ చేయవద్దని సూచించారు. జాతరలో జనసామర్థ్యం పెరుగుతున్న నేపథ్యంలో ఎలాంటి అవాంఛనీయ సంఘటనలు జరగకుండా ప్రభుత్వం భారీ భద్రతా ఏర్పాట్లు చేసింది. భక్తులు క్రమశిక్షణతో వ్యవహరించి, అధికారుల సూచనలు పాటించాలని పోలీసులు విజ్ఞప్తి చేస్తున్నారు.
జాతర ముఖ్య ఘట్టాలు (2026):
-
జనవరి 28: సారలమ్మ, గోవిందరాజులు, పగిడిద్దరాజు గద్దెలపైకి రాక.
-
జనవరి 29: చిలుకలగుట్ట నుంచి సమ్మక్క దేవత రాక (ప్రధాన ఘట్టం).
-
జనవరి 30: భక్తుల మొక్కులు, నిలువెత్తు బంగారం (బెల్లం) సమర్పణ.
-
జనవరి 31: దేవతల వనప్రవేశంతో జాతర ముగింపు.
