ఆసియాలోనే అతిపెద్ద ఆదివాసీ జాతరగా పేరొందిన మేడారం సమ్మక్క-సారలమ్మ మహాజాతర సందడి అధికారికంగా ప్రారంభమైంది. బుధవారం వనదేవతల పూజారులు అత్యంత భక్తిశ్రద్ధలతో ‘గుడి మెలిగె పండుగ’ను నిర్వహించడంతో జాతర పూజా తంతుకు అంకురార్పణ జరిగింది. ఈ వేడుకను పురస్కరించుకుని మేడారం, కన్నెపల్లి, పునుగొండ్ల, కొండాయి గ్రామాల్లోని ఆలయాలు ఆధ్యాత్మిక శోభను సంతరించుకున్నాయి. ఆదివాసీ సంప్రదాయం ప్రకారం పుట్టమట్టి, గుట్టగడ్డితో ఆలయాలను ముస్తాబు చేసి దీపధూప నైవేద్యాలు సమర్పించారు.
ఈ క్రతువులో భాగంగా పూజారులు, వారి కుటుంబ సభ్యులు అడవి నుంచి తెచ్చిన గడ్డితో గుడి పైకప్పులను వేయగా, మహిళలు పుట్టమట్టితో ఆలయ ప్రాంగణాలను అలంకరించారు. జాతర ముగిసే వరకు పూజారులు కఠిన నియమ నిష్ఠలతో ఉంటూ అమ్మవార్లకు సేవలు చేయనున్నారు. జాతర ప్రధాన ఘట్టానికి ఇంకా సమయం ఉన్నప్పటికీ, ముందస్తు మొక్కుల కోసం భక్తులు ఇప్పుడే మేడారానికి పోటెత్తుతున్నారు. బుధవారం ఒక్కరోజే సుమారు 50 వేల మంది భక్తులు వనదేవతలను దర్శించుకున్నట్లు అధికారులు అంచనా వేస్తున్నారు.
భక్తులు జంపన్నవాగులో పుణ్యస్నానాలు ఆచరించి, అమ్మవార్ల గద్దెల వద్ద ‘బంగారం’ (బెల్లం), పసుపు, కుంకుమ, నూతన వస్త్రాలను సమర్పించి మొక్కులు చెల్లించుకుంటున్నారు. తెలంగాణతో పాటు ఆంధ్రప్రదేశ్, ఛత్తీస్గఢ్, మహారాష్ట్రల నుంచి కూడా భక్తులు భారీగా తరలివస్తున్నారు. భక్తుల రద్దీని దృష్టిలో ఉంచుకుని దేవాదాయ శాఖ, జిల్లా యంత్రాంగం ప్రత్యేక ఏర్పాట్లు చేస్తోంది. జాతర సమీపిస్తున్న కొద్దీ ఆర్టీసీ మరిన్ని ప్రత్యేక బస్సు సర్వీసులను అందుబాటులోకి తెచ్చేందుకు సిద్ధమవుతోంది.
