నియంత పాలనకు ప్రజలు చరమగీతం పాడారు
గత ప్రభుత్వ పనితీరుపై గవర్నర్ ఘాటు వ్యాఖ్యలు
త్వరలోనే రైతు రుణ మాఫీ
100 రోజుల్లో ఖచ్చితంగా ఆరు గ్యారంటీల అమలు
గణతంత్ర వేడుకల్లో గవర్నర్ తమిళి సై
అహంకారం, నియంతృత్వం చెల్లదని తెలంగాణ ప్రజలు తీర్పు ఇచ్చారని గవర్నర్ తమిళిసై సౌందరరాజన్ అన్నారు. నియంతృత్వ ధోరణికి చరమగీతం పాడారని చెప్పారు. రిపబ్లిక్ డే సందర్భంగా శుక్రవారం ఆమె నాంపల్లి పబ్లిక్ గార్డెలో జాతీయ జెండాను ఎగురవేశారు. అంతకు ముందు గవర్నర్ అక్కడికి చేరుకున్నవెంటనే సీఎం రేవంత్ రెడ్డి, సీఎస్ శాంతికుమారిలతో పాటు మంత్రులు, ఇతర అధికారులు ఘన స్వాగతం పలికారు. అనంతరం గవర్నర్ ప్రజలను ఉద్దేశించి ప్రసంగించారు. భారతదేశం, భిన్న జాతులు, మతాలు, కులాల సమాహారమని తమిళిసై చెప్పారు. కానీ రాజ్యాంగం అందరినీ ఏకం చేసిందని చెప్పారు. ఒకే జాతిగా నిలబెట్టిందని కొనియాడారు. తెలంగాణ ప్రభుత్వం బడుగుల జీవితాల్లో వెలుగులు నిపేందుకు కట్టుబడి ఉందని తెలిపారు. రాజ్యాంగం చూపిన బాటలో ముందుకు వెళ్తుందన్నారు.
పాలకులెవరైనా రాజ్యాంగానికి విరుద్ధంగా వ్యవహిరిస్తే ప్రజలు చూస్తూ ఊరుకోరని గవర్నర్ అన్నారు. ప్రజలు పోరాటాలు, తీర్పుల ద్వారా అధికారాన్ని కూడా కంట్రోల్ చేయగలరని తెలిపారు. భారత రాజ్యాంగం కల్పించిన హక్కుల ద్వారానే తెలంగాణ రాష్ట్రాన్ని సాధించుకున్నామని ఆమె అన్నారు. గత పదేళ్లలో పాలకులు రాజ్యాంగ స్ఫూర్తికి భిన్నంగా వ్యవహరించారని పరోక్షంగా కేసీఆర్ పదేళ్ళ పాలనను ఉద్దేశించి అన్నారు. నియంతృత్వ ధోరణితో ముందుకు సాగాడాన్ని తెలంగాణ ప్రజలు సహించబోరని తెలిపారు. అందుకే ఎన్నికల తీర్పుతో దానికి చరమగీతం పాడారని గవర్నర్ తమిళిసై అన్నారు. ప్రస్తుతం రాష్ట్రంలో ప్రజా ప్రభుత్వాన్ని ఏర్పాటు చేసుకున్నామని పేర్కొన్నారు. నియంతృత్వం, అహంకారం చెల్లబోదని తెలంగాణ ప్రజలు తీర్పు ఇచ్చారని చెప్పారు. రైతులకు ఇచ్చిన హామీలను నెరవేర్చేందుకు రాష్ట్ర ప్రభుత్వం కట్టుబడి ఉందని అన్నారు.
రూ.2 లక్షల రుణమాఫీ చేసేందుకు బ్యాంకులతో ప్రభుత్వం సంప్రదింపులు జరుపుతోందని గవర్నర్ అన్నారు. అలాగే ఉద్యోగాల భర్తీపై యువత ఎలాంటి అపోహలకూ గురికావద్దని సూచించారు. తెలంగాణ పబ్లిక్ సర్వీస్ కమిషన్ ప్రక్షాళన పూర్తి అయిన వెంటనే ఉద్యోగాల భర్తీ ప్రక్రియ మొదలు అవుతుందని ఆమె హామీ ఇచ్చారు. ప్రభుత్వం ప్రకటించిన ఆరు గ్యారంటీలలో రెండింటిని ఇప్పటికే అమలు చేస్తున్నారని, మరో రెండింటిని త్వరలోనే అమలు చేయబోతున్నామని, మొత్తంగా 100 రోజులలో ఆరు గ్యారంటీలను పూర్తిగా అమలయ్యేలా ప్రభుత్వం చర్యలు తీసుకుంటుందన్నారు.
