ప్రసిద్ధ పంచారామ క్షేత్రమైన ద్రాక్షారామంలో మంగళవారం ఉదయం కపాలేశ్వర స్వామి శివలింగం ధ్వంసమైన స్థితిలో కనిపించడం రాష్ట్రవ్యాప్తంగా కలకలం రేపింది. ఈ ఘటనపై ముఖ్యమంత్రి చంద్రబాబు నాయుడు తీవ్రంగా స్పందించి, నిందితులను వెంటనే పట్టుకోవాలని ఆదేశించారు. దీంతో రంగంలోకి దిగిన ఆరు ప్రత్యేక పోలీసు బృందాలు సీసీటీవీ ఫుటేజ్ మరియు స్థానిక ఆధారాల సహాయంతో నిందితుడిని గుర్తించి అదుపులోకి తీసుకున్నాయి.
ఎస్పీ రాహుల్ మీనా వెల్లడించిన వివరాల ప్రకారం.. నిందితుడు శ్రీనివాసరావుకు ఆలయ పూజారితో గత కొంతకాలంగా వ్యక్తిగత విభేదాలు ఉన్నాయి. నిందితుడి ఇంటి ముందు డ్రైనేజీ కాలువ నిర్మాణం మరియు పైపులైన్ల విషయంలో పూజారితో వివాదం నెలకొంది. ఈ క్రమంలో సదరు పూజారిని ఇబ్బంది పెట్టాలనే ఉద్దేశంతోనే, ఆయన పూజలు నిర్వహించే శివలింగాన్ని శ్రీనివాసరావు సుత్తితో ధ్వంసం చేశాడు. ఈ చర్య ద్వారా నింద పూజారి మీదకు వెళ్తుందనే దురుద్దేశంతోనే నిందితుడు ఈ దారుణానికి ఒడిగట్టాడని పోలీసులు ప్రాథమికంగా నిర్ధారించారు.
ఈ ఘటనలో ఎటువంటి మతపరమైన కోణం లేదని, ఇది కేవలం వ్యక్తిగత కక్షతో చేసిన పనేనని పోలీసులు స్పష్టం చేశారు. నిందితుడు స్వయంగా హిందువు మరియు శివ భక్తుడని విచారణలో తేలింది. నిందితుడి నుంచి ఘటనకు ఉపయోగించిన ఆయుధం, స్కూటీని పోలీసులు స్వాధీనం చేసుకున్నారు. ప్రస్తుతం ద్రాక్షారామంలో ధ్వంసమైన శివలింగం స్థానంలో కొత్త లింగాన్ని ఇప్పటికే పునఃప్రతిష్ఠించారు. భక్తులు ఎటువంటి పుకార్లను నమ్మవద్దని పోలీసులు విజ్ఞప్తి చేశారు.
