తిరుమల శ్రీవారి ఆలయం పరకామణిలో జరిగిన చోరీ కేసు దర్యాప్తులో కీలక ముందడుగు పడింది. ఈ కేసుపై విచారణ జరిపిన ప్రత్యేక దర్యాప్తు బృందం (సిట్) మంగళవారం నాడు ఆంధ్రప్రదేశ్ హైకోర్టుకు తన నివేదికను సీల్డ్ కవర్లో సమర్పించింది. ఈ నివేదికను సిట్ బృందానికి నేతృత్వం వహించిన సీఐడీ అదనపు డీజీ రవిశంకర్ అయ్యనార్ న్యాయస్థానానికి అందజేశారు. ఈ కేసుపై తదుపరి విచారణను హైకోర్టు శుక్రవారం చేపట్టనుంది.
2023 ఏప్రిల్లో టీటీడీ ఉద్యోగి రవికుమార్ 920 డాలర్లు దొంగిలిస్తూ పట్టుబడ్డాడు. అయితే, ఈ కేసును లోక్ అదాలత్కు బదిలీ చేసి, నిందితుడు రవికుమార్ తనకు చెందిన రూ.40 కోట్ల విలువైన ఆస్తులను టీటీడీకి విరాళంగా ఇవ్వడంతో కేసును రాజీ ఫార్ములాతో మూసివేశారు. ఇంత పెద్ద మొత్తంలో ఆస్తులు విరాళంగా ఇచ్చి కేసును మూసివేయించడంపై అనుమానాలు వ్యక్తమయ్యాయి. దీనిపై మాచర్ల శ్రీనివాస్ అనే వ్యక్తి హైకోర్టులో పిటిషన్ దాఖలు చేయగా, హైకోర్టు దర్యాప్తు చేయాలని సిట్ను ఆదేశించింది.
సిట్ అధికారులు ఈ విచారణలో భాగంగా, అప్పటి టీటీడీ ఛైర్మన్లు బి. కరుణాకర్ రెడ్డి, లోక్ అదాలత్లో పరిష్కారం జరిగినప్పుడు ఛైర్మన్గా ఉన్న వైవీ సుబ్బారెడ్డిని, మాజీ ఈవో ధర్మారెడ్డిని, అలాగే పలువురు టీటీడీ, పోలీసు అధికారులను ప్రశ్నించి వారి వాంగ్మూలాలను నమోదు చేశారు. ఇప్పుడు సిట్ సమర్పించిన నివేదిక ఆధారంగా హైకోర్టు తీసుకోబోయే నిర్ణయంపై సర్వత్రా ఆసక్తి నెలకొంది.
