ఆంధ్రప్రదేశ్ రాష్ట్ర రోడ్డు రవాణా సంస్థ (APSRTC)లో ప్రస్తుత బస్సుల స్థానంలో విద్యుత్ వాహనాలను (EVs) ప్రవేశపెట్టాలని రాష్ట్ర ప్రభుత్వం కీలక నిర్ణయం తీసుకుంది. పర్యావరణహిత రవాణాకు ప్రాధాన్యత ఇవ్వడంతో పాటు, కేంద్ర ప్రభుత్వం ప్రకటించిన ‘పీఎం ఈ-డ్రైవ్’ పథకం ప్రయోజనాలను అందిపుచ్చుకోవాలని ముఖ్యమంత్రి చంద్రబాబు నాయుడు లక్ష్యంగా పెట్టుకున్నారు. ఈ ఈ-వెహికల్ ప్రాజెక్ట్ కోసం రాష్ట్ర ప్రభుత్వం ₹500 కోట్లను కేటాయించనుంది.
ఏపీఎస్ఆర్టీసీలో విద్యుత్ వాహనాల విధానాన్ని సమర్థంగా అమలు చేయడానికి అవసరమైన మౌలిక సదుపాయాల కల్పనపై సీఎం చంద్రబాబు నాయుడు దృష్టి సారించారు. ఇందులో భాగంగా, ప్రయాణంలో ప్రతి 30 కిలోమీటర్లకు ఒక ఛార్జింగ్ స్టేషన్ను ఏర్పాటు చేయాలని ప్రభుత్వం ప్రణాళిక రూపొందిస్తోంది. అంతేకాకుండా, ఈ-మొబిలిటీ రంగంలో నూతన ఆవిష్కరణలను, స్టార్టప్లను ప్రోత్సహించేందుకు రాష్ట్రవ్యాప్తంగా 100 ఇన్క్యుబేషన్ కేంద్రాలను నెలకొల్పాలని నిర్ణయించారు. ఈ చర్యల ద్వారా రవాణా వ్యవస్థతో పాటు అనుబంధ పారిశ్రామిక రంగాన్ని కూడా బలోపేతం చేయాలని ప్రభుత్వం యోచిస్తోంది.
ఏపీఎస్ఆర్టీసీలో విద్యుత్ వాహనాల ప్రవేశాన్ని వేగవంతం చేయడానికి, కేంద్ర ప్రభుత్వ ‘పీఎం ఈ-డ్రైవ్’ పథకం కింద ఉన్న ₹10,900 కోట్ల ఫండ్ను అందిపుచ్చుకోవాలని ప్రభుత్వం ప్రత్యేక ప్రణాళికను రూపొందిస్తోంది. ఈ కేంద్ర నిధులను వినియోగించుకోవడం ద్వారా రాష్ట్ర ప్రభుత్వ ఆర్థిక భారం తగ్గుతుందని, నిర్ణీత గడువులోగా ప్రాజెక్ట్ను పూర్తి చేయవచ్చని అధికారులు అంచనా వేస్తున్నారు.
