తెలంగాణ ప్రజలకు వాతవరణ శాఖ అలర్ట్ జారీ చేసింది. అల్పపీడనానికి అనుబంధంగా ఉపరితల ఆవర్తన ద్రోణి ఏర్పడటంతో మూడు రోజులపాటు భారీ నుంచి అతి భారీ వర్షాలు కురిసే అవకాశం ఉందని హైదరాబాద్ వాతావరణ కేంద్రం డైరెక్టర్ నాగరత్న వెల్లడించారు. హైదరాబాద్ సహా రాష్ట్రంలోని పలు జిల్లాల్లో భారీ వర్షాలు.. కొన్ని జిల్లాల్లో అతి భారీ వర్షాలు కురిసే అవకాశాలుండాగా.. మరికొన్ని ప్రాంతాల్లో అత్యంత భారీ వర్షాలు కురిసే ఛాన్స్ కూడా ఉందని నాగరత్న తెలంపారు. ఈ నేపథ్యంలోనే రాష్ట్రవ్యాప్తంగా రెడ్ అలర్ట్ జారీ చేసినట్టు తెలిపారు. అయితే. ఒడిశాతో పాటు దాన్ని ఆనుకుని ఉన్న జార్ఖండ్ ప్రాంతాల్లో అల్పపీడనం ఏర్పడిందని.. దీనికి అనుబంధంగా 7.6 కిలోమీటర్ల ఎత్తున ఉపరితల ఆవర్తనం కొనసాగుతున్నట్టు నాగరత్న వివరించారు.
ఈ అవర్తనం ప్రభావంతో తెలంగాణ రాష్ట్రంలో మహబూబాబాద్, వరంగల్, హనుమకొండ, ఖమ్మం జిల్లాలో అతి భారీ నుంచి అత్యంత భారీ వర్షాలు కురిసే అవకాశాలున్నాయి. సిద్దిపేట, జనగామ, నిజామాబాద్, పెద్దపల్లి, జగిత్యాల, జయశంకర్ భూపాలపల్లి, ములుగు జిల్లాల్లో భారీ నుంచి అతి భారీ వర్షాలు కురిసే అవకాశం ఉంది. ఆదిలాబాద్, కుమురం భీం ఆసిఫాబాద్, మంచిర్యాల, నిర్మల్, నిజామాబాద్, రాజన్న సిరిసిల్ల, మెదక్, మేడ్చల్ మల్కాజిగిరి, సంగారెడ్డి, రంగారెడ్డి ప్రాంతాల్లో భారీ వర్ష సూచనలు కనిపిస్తున్నాయని నాగరత్న పేర్కొన్నారు.
హైదరాబాద్ పరిసర జిల్లాల్లో కూడా మోస్తరు నుంచి భారీ వర్షాలు కురిసే ఛాన్సులున్నాయని వాతావరణ శాఖ అధికారుల చెప్తున్నారు. ఇక హైదరాబాద్ నగరంలోనూ ఎడతెరపిలేని వర్షాలతో పాటు అప్పుడప్పుడు భారీ నుంచి వేగవంతమైన జల్లులు కురిసే అవకాశం ఉందని అంచనా వేస్తున్నారు.
