ఓటు హక్కు వినియోగించుకోని జగన్ కు ఎన్నికల గురించి మాట్లాడే నైతిక హక్కు లేదని పొన్నూరు ఎమ్మెల్యే ధూళిపాళ్ల నరేంద్ర కుమార్ తీవ్రంగా విమర్శించారు. ప్రజా తీర్పును గౌరవించడం జగన్ డీఎన్ఏలోనే లేదని, ఆయన మాటల్లో ఆత్మస్తుతి, పరనింద తప్ప మరేమీ కనిపించడం లేదని ఎద్దేవా చేశారు. గురువారం మంగళగిరిలోని టీడీపీ కేంద్ర కార్యాలయంలో నిర్వహించిన మీడియా సమావేశంలో ఆయన మాట్లాడారు. నేడు జడ్పీటీసీ, ఎంపీటీసీ ఎన్నికల పోలింగ్ నేపథ్యంలో జగన్ చేసిన వ్యాఖ్యలపై ఘాటుగా బదులిచ్చారు.
“ప్రజాస్వామ్యంలో ఓటు అనేది అత్యంత పవిత్రమైనది. పేదవాడి నుంచి రాష్ట్రపతి వరకు అందరికీ ఓటు ఉంటుంది. కానీ, బెంగళూరు నుంచి హెలికాప్టర్‌లో వచ్చి, పోలింగ్ బూత్ దగ్గరకు వెళ్లి ఓటు వేయకుండా వెనక్కి వచ్చిన ఏకైక రాజకీయ నాయకుడు జగన్. ఇది ప్రజాస్వామ్యం పట్ల, ప్రజల ఓటు పట్ల ఆయనకు ఉన్న చిన్నచూపును స్పష్టం చేస్తోంది. ఓటు వేయని నాయకుడిగా జగన్ చరిత్రలో నిలిచిపోతారు” అని ధూళిపాళ్ల అన్నారు.
2024 అసెంబ్లీ ఎన్నికల్లో ప్రజలిచ్చిన తీర్పును గౌరవించకుండా, ఈవీఎంల వల్లే కూటమి గెలిచిందని జగన్ ప్రచారం చేశారని, ఇప్పుడు బ్యాలెట్ పద్ధతిలో జరిగిన స్థానిక సంస్థల ఎన్నికల్లోనూ ఓటమి తర్వాత అదే పంథాను అనుసరిస్తున్నారని విమర్శించారు. “అధికారంలో ఉన్నప్పుడు ఏకగ్రీవాలు జరిగితే అద్భుతం అన్నారు. ఇప్పుడు అదే జరిగితే దౌర్జన్యం అంటున్నారు. ఇది ద్వంద్వ నీతి కాదా?” అని ఆయన ప్రశ్నించారు. వారి హయాంలో స్టేట్ ఎలక్షన్ కమిషన్‌ను నిర్వీర్యం చేశారని, నాటి కమిషనర్ ప్రాణభయంతో కేంద్రానికి లేఖ రాసిన విషయాన్ని జగన్ గుర్తుంచుకోవాలని హితవు పలికారు.
ప్రస్తుత స్థానిక సంస్థల ఎన్నికల్లో వైసీపీ భారీ సంఖ్యలో నామినేషన్లు వేసిందని, వాస్తవాలను కప్పిపుచ్చి ప్రభుత్వంపై ఆరోపణలు చేస్తోందని నరేంద్ర కుమార్ అన్నారు. “ఎంపీటీసీ స్థానాల్లో 17,726, జెడ్పీటీసీల్లో 1,445, కార్పొరేషన్లలో 367 చోట్ల మీ అభ్యర్థులు నామినేషన్లు వేశారు. పోలీసులే మీకు రక్షణగా ఉండి నామినేషన్లు వేయించారు. నిజంగా ప్రభుత్వం రిగ్గింగ్ చేసి ఉంటే, మీ పార్టీకి చెందిన ఒక మేయర్ సహా నలుగురు అభ్యర్థులు ఎలా గెలిచారు?” అని నిలదీశారు.
ఎన్నికలను అడ్డుకోవడానికి డీలిమిటేషన్, బీసీ రిజర్వేషన్లపై వైసీపీ 61 కేసులు వేసిందని, అయినా సుప్రీంకోర్టు ప్రజాక్షేత్రంలో తేల్చుకోమని చెప్పడంతో ఎన్నికలు పారదర్శకంగా జరిగాయని వివరించారు. “వైసీపీ నమ్ముకున్నది విధ్వంసాన్ని. మేము నమ్ముకున్నది ప్రజలను, అభివృద్ధిని, సంక్షేమాన్ని. రెండేళ్లలో కూటమి ప్రభుత్వం చేసిన పనులను చూసే ప్రజలు స్థానిక ఎన్నికల్లోనూ వైసీపీని నాలుగు స్థానాలకే పరిమితం చేశారు” అని తెలిపారు. 2024లో ప్రజలిచ్చిన షాక్ ట్రీట్‌మెంట్‌ను మరోసారి స్థానిక ఎన్నికల్లో ఇచ్చారని, ఓటమిని జీర్ణించుకోలేక వైసీపీ నేతలు నిరాశతో మాట్లాడుతున్నారని అన్నారు.
అసెంబ్లీకి రాకుండా, అప్పుడప్పుడు వచ్చి ప్రభుత్వంపై బురద చల్లి వెళ్లే ధోరణిని జగన్ మానుకోవాలని ధూళిపాళ్ల సూచించారు. ప్రజాతీర్పును గౌరవించి, ప్రజా సమస్యలపై పోరాడాలని, అనవసరమైన ఆరోపణలతో ప్రజాస్వామ్యాన్ని అపహాస్యం చేయవద్దని ఆయన హితవు పలికారు. కూటమి ప్రభుత్వం ప్రజల సంక్షేమం, గ్రామాల అభివృద్ధి కోసం నిరంతరం పనిచేస్తుందని ఆయన స్పష్టం చేశారు.
