తెలంగాణ శాసనసభ బడ్జెట్ సమావేశాలు అధికార కాంగ్రెస్ మరియు ప్రతిపక్ష బీఆర్ఎస్ మధ్య హోరాహోరీ పోరుకు వేదికయ్యాయి. అయితే, ఈ చర్చల్లో ప్రతిపక్ష నేత కేసీఆర్ గైర్హాజరీ బీఆర్ఎస్ పార్టీకి పెద్ద మైనస్గా మారింది. ముఖ్యమంత్రి రేవంత్ రెడ్డి తనదైన శైలిలో దూకుడు ప్రదర్శిస్తూ విమర్శనాస్త్రాలు సంధిస్తుంటే, వాటిని తిప్పికొట్టడంలో గులాబీ దళం ఆశించిన స్థాయిలో ప్రభావం చూపలేకపోతోంది. కేసీఆర్ లేని లోటును రేవంత్ రెడ్డి తనకు అనుకూలంగా మార్చుకుంటూ, సభలో చర్చను ‘వార్ వన్ సైడ్’ అన్నట్లుగా మార్చేస్తున్నారు.
ప్రతిపక్షం తరపున కేటీఆర్, హరీష్ రావు గళం విప్పుతున్నప్పటికీ, రేవంత్ రెడ్డి వ్యూహాత్మక ఎదురుదాడి ముందు వారు తేలిపోతున్నట్లు కనిపిస్తోంది. ముఖ్యంగా ఆరు గ్యారెంటీలు, నిరుద్యోగ భృతి వంటి అంశాలపై కేటీఆర్ విమర్శలు చేస్తున్న సమయంలో, రేవంత్ రెడ్డి గత ప్రభుత్వ వైఫల్యాలను సాక్ష్యాధారాలతో బయటపెడుతున్నారు. దీంతో చర్చ బీఆర్ఎస్ అజెండా వైపు సాగాల్సింది పోయి, తిరిగి వారి పాత పాలనలోని లోపాలపై విమర్శలకే పరిమితమవుతోంది. కేసీఆర్ మార్క్ వ్యూహచతురత లేకపోవడం వల్ల ప్రతిపక్ష పోరాటం ఆశించిన ఫలితాలను ఇవ్వడం లేదని రాజకీయ విశ్లేషకులు భావిస్తున్నారు.
మరోవైపు కేసీఆర్ సభకు రాకపోవడాన్ని కాంగ్రెస్ ఒక బలమైన రాజకీయ అస్త్రంగా వాడుకుంటోంది. ప్రజలు ఓట్లేసి గెలిపించినా బాధ్యతగా సభకు వచ్చి సమస్యలపై మాట్లాడటం లేదని, కేవలం జీతభత్యాలు పొందుతున్నారని రేవంత్ రెడ్డి చేస్తున్న ఘాటు వ్యాఖ్యలు బీఆర్ఎస్ శ్రేణుల్లో ఆందోళన కలిగిస్తున్నాయి. రేవంత్ రెడ్డి వంటి వాగ్ధాటి కలిగిన నేతను ఢీకొనాలన్నా, సభలో పట్టు సాధించాలన్నా కేసీఆర్ అనుభవం పార్టీకి అత్యవసరమని స్పష్టమవుతోంది. కేసీఆర్ స్వయంగా రంగంలోకి దిగితే తప్ప, అసెంబ్లీలో కాంగ్రెస్ ఏకపక్ష దూకుడుకు అడ్డుకట్ట వేయడం కష్టమని రాజకీయ వర్గాలు అంటున్నాయి.
