తెలంగాణ ప్రభుత్వం తన బడ్జెట్లో అత్యంత ప్రతిష్టాత్మకమైన “ఇందిరమ్మ ఫ్యామిలీ లైఫ్ ఇన్సూరెన్స్ స్కీమ్”ను ప్రకటించింది. ఈ పథకం కింద రాష్ట్రంలోని సుమారు 1.15 కోట్ల కుటుంబాలకు రూ. 5 లక్షల జీవిత బీమా కవరేజీని కల్పించనున్నారు. 2026 జూన్ 2 నుంచి అమల్లోకి రానున్న ఈ పథకం, పేద, మధ్యతరగతి మరియు ధనిక అనే తేడా లేకుండా అందరికీ వర్తిస్తుందని ప్రభుత్వం వెల్లడించింది. కుటుంబంలో సంపాదించే వ్యక్తి మరణిస్తే, ఆ కుటుంబం ఆర్థికంగా కుంగిపోకుండా అండగా నిలవడమే ఈ సోషల్ సెక్యూరిటీ స్కీమ్ యొక్క ప్రధాన ఉద్దేశ్యం.
ఇప్పటికే కేంద్రం అమలు చేస్తున్న ప్రధానమంత్రి జీవన్ జ్యోతి బీమా యోజన (PMJJBY)తో పోలిస్తే, తెలంగాణ పథకం మరింత విస్తృతమైనదిగా కనిపిస్తోంది. PMJJBY వ్యక్తిగత బీమా పథకం కాగా, రాష్ట్ర ప్రభుత్వం ప్రకటించిన ఈ పథకం కుటుంబాన్ని ఒక యూనిట్గా తీసుకుంటుంది. అంతేకాకుండా, PMJJBYలో లబ్ధిదారులు ప్రీమియం చెల్లించాల్సి ఉంటుంది, కానీ ఇందిరమ్మ ఇన్సూరెన్స్ పథకంలో ప్రీమియం మొత్తాన్ని ప్రభుత్వమే భరిస్తుంది. నాగాలాండ్ వంటి రాష్ట్రాలు ఇలాంటి పథకాలు ప్రారంభించినప్పటికీ, ఇంత పెద్ద సంఖ్యలో లబ్ధిదారులకు కవరేజీ ఇస్తున్న రాష్ట్రంగా తెలంగాణ దేశానికే ఆదర్శంగా నిలవనుంది.
అయితే, ఈ పథకం అమలులో ప్రభుత్వం కొన్ని సవాళ్లను ఎదుర్కోవాల్సి ఉంటుంది. కుటుంబ నిర్వచనం, కుటుంబ పోషకుడిని గుర్తించడం, లబ్ధిదారుల డేటాబేస్ సిద్ధం చేయడం వంటి అంశాలపై విధివిధానాలు ఇంకా ఖరారు కావాల్సి ఉంది. అలాగే భారీగా ఉండబోయే ప్రీమియం భారాన్ని ప్రభుత్వం ఎలా భరిస్తుంది? కేంద్ర పథకంతో దీనిని ఎలా అనుసంధానిస్తుంది? అనే ప్రశ్నలకు స్పష్టత రావాలి. క్లెయిమ్ సెటిల్మెంట్ ప్రక్రియ వేగంగా జరిగితేనే, గతంలో రాజశేఖర్ రెడ్డికి ఆరోగ్యశ్రీ, కేసీఆర్కు రైతు బీమా తెచ్చిన గుర్తింపు రేవంత్ రెడ్డికి కూడా ఈ పథకం ద్వారా లభించే అవకాశం ఉంది.
